जनकपुरधाम । चार महिना अघि गठन भएको कांग्रेसका कृष्ण यादव नेतृत्वको मधेश सरकारको कामले गति लिन नसकेपछि सत्ता गठबन्धनभित्र असन्तुष्टि बढ्न थालेको छ ।
सत्ता गठबन्धनमा रहेको जनमत पार्टीले सरकारको कार्यशैलीमाथि प्रश्न उठाउँदै समर्थन पुनर्विचार गर्ने चेतावनी दिएको छ । केही दिनअघि काठमाडौंमा सम्पन्न पार्टीको सचिवालय बैठकमा मधेश सरकारको कामको समीक्षा गरिएको थियो। बैठकमा सरकारको नेतृत्व अपेक्षित रूपमा प्रभावकारी नभएको विषय उठेको जनाइएको छ ।
जनमत पार्टीका महासचिव चन्दन सिंहका अनुसार सरकारले वार्षिक बजेट खर्च गर्न नसकेको र पुँजीगत खर्चसमेत न्यून रहेको छ। उनले केही योजनाको टेन्डर प्रक्रिया नै अगाडि नबढेको आरोप पनि लगाए ।
‘सरकारले भनेजस्तो काम गरेको छैन। यही अवस्थामा सुधार नल्याउने हो भने समर्थन पुनर्विचार गर्नुपर्ने हुनसक्छ,’ महासचिव सिंहले बताए। उनले सरकारले गति नलिए गठबन्धनभित्र थप असन्तुष्टि बढ्ने चेतावनीसमेत दिए ।
उनका अनुसार नयाँ बजेटको तयारीको समय नजिकिँदै गर्दा नीति आयोग पनि कमजोर अवस्थामा रहेको छ । साथै गठबन्धन संस्कृतिअनुसार सरकार सञ्चालन हुन नसकेको आरोप पनि उनले लगाए ।
यसअघि एमालेका सरोज यादवलाई होटलमा सपथ खुवाउँदै मुख्यमन्त्री बनाइएपछि उत्पन्न राजनीतिक विवादका कारण मधेश सरकार अस्थिर बन्दै आएको हो । उक्त घटनापछि प्रदेशका सबै दलहरू एमालेविरुद्ध गठबन्धन गर्दै कांग्रेसका कृष्ण यादवको नेतृत्वमा सरकार गठन गरिएको थियो ।
हाल मधेश सरकारमा कांग्रेस, जसपा, जनमत र नेकपा सहभागी छन् । जनमत पार्टीले अर्थ तथा समाजिक र खेलकुद मन्त्रालयको जिम्मेवारी सम्हालिरहेको छ ।
जेन–जी आन्दोलनपछि नेतृत्व विवादमा कांग्रेस आन्तरिक रूपमा अल्झिँदा सरकारको कामकाजमा थप समस्या देखिएको गठबन्धनका नेताहरूले बताएका छन् ।
