रौतहटको कटहरिया नगरपालिकामा बोक्सीको आरोपमा एक दलित महिलामाथि अमानवीय तथा जघन्य व्यवहार गरिएको घटना सार्वजनिक भएको छ ।
कटहरिया नगरपालिका–९ की ५५ वर्षीया पूर्व वडा सदस्य अंकलिया देवी मुसहरलाई स्थानीय केही व्यक्तिले बलपूर्वक मानव मलमूत्र खुवाएको आरोप लागेको छ । शनिबार साँझ भएको उक्त घटनाले स्थानीय क्षेत्रमा त्रास र आक्रोश फैलाएको छ ।
प्राप्त जानकारी अनुसार डूमरिया मुसहरी टोलमा छिमेकी पुकार माझीको छोराको बिहेको अवसरमा पर्साबाट आएको जन्तीमा सहभागी एक १० वर्षीय बालक बिरामी भई उल्टी गरेका थिए । सोही विषयलाई निहुँ बनाउँदै बालकलाई जादुटुना गरेर मार्न खोजेको आरोप लगाई स्थानीय १५–२० जनाको समूहले अंकलिया देवीमाथि कुटपिटसहित अमानवीय व्यवहार गरेको बताइएको छ । प्रत्यक्षदर्शी तथा पीडितकी छोरी सुमिला देवीका अनुसार स्थानीय पुकार माझी, राजेन्द्र माझी, लक्ष्मी माझी, शंकर माझी, सुरेन्द्र ठाकुर, गौरी साह लगायतका व्यक्तिहरू घरभित्रै प्रवेश गरी बियरको बोतलमा मलमूत्र घोलेर जबरजस्ती खुवाएका थिए । विरोध गर्दा कुटपिटसमेत गरिएको उनले बताइन् ।
घटनापछि इलाका प्रहरी कार्यालय कटहरियाबाट सई मोहन आले मगरको नेतृत्वमा पुगेको टोलीले पीडितको उद्धार गरी प्राथमिक स्वास्थ्य केन्द्रमा उपचारका लागि पठाएको थियो । प्रहरीले अचेत अवस्थामा रहेकी महिलाको उपचारपछि स्वास्थ्य अवस्था सामान्य रहेको जनाएको छ ।
घटनालगत्तै आरोपितहरूलाई पक्राउ गर्न पुगेको प्रहरी टोलीमाथि स्थानीयले अवरोध गर्नुका साथै आक्रमणको प्रयाससमेत गरेका थिए । हाल पीडितलाई इलाका प्रहरी कार्यालय गरुडामा राखिएको छ भने आरोपितहरूको खोजी भइरहेको प्रहरीले जनाएको छ । इलाका प्रहरी कार्यालय गरुडाका प्रमुख डिएसपी शंकर प्रसाद आचार्यले घटनाको गम्भीर अनुसन्धान भइरहेको र दोषीलाई कानुनअनुसार कडा कारबाही गरिने बताएका छन्। उनले घटनास्थलमा थप प्रहरी परिचालन गरिएको जानकारी दिए ।
मुसहर समुदायमा बिहेपछि ‘सरियतिया’ जाने परम्परा रहेको र उक्त अवसरमा भोज तथा मदिरा सेवन गर्ने चलन रहँदै आएको छ ।
