नेपाल विद्युत् प्राधिकरण वीरगंज वितरण केन्द्र अन्तर्गत ठेक्कामार्फत सञ्चालन भइरहेको विद्युत् पोल जडान कार्यमा गम्भीर अनियमितता भइरहेको तथ्य सार्वजनिक भएको छ ।
विशेषगरी ग्रामीण क्षेत्रमा मापदण्डविपरीत पोल जडान गर्दा विद्युत् आपूर्तिमा पटकपटक अवरोध सिर्जना हुने गरेको पाइएको छ । प्राधिकरणको प्राविधिक मापदण्ड अनुसार विद्युत् पोल कम्तीमा दुई मिटर अर्थात् करिब सात फिट गहिराइसम्म खनेर जडान गर्नुपर्ने व्यवस्था छ ।
तर ठेकेदारहरूले लागत बचत गर्ने उद्देश्यले केवल चार फिट गहिराइमा मात्र पोल गाड्ने गरेको स्थानीयवासीले गुनासो गरेका छन् । यसरी कम गहिराइमा जडान गरिएका पोलहरू सामान्य हावाहुरी र वर्षामा समेत सजिलै ढल्ने गरेका छन् ।
ग्रामीण क्षेत्रमा खेतबारी तथा सडकछेउका जमीन प्रायः मलिलो हुने र वर्षायाममा हिलाम्य बन्ने भएकाले पोल मजबुत रूपमा टिक्न नसक्ने समस्या झन् गम्भीर बन्दै गएको छ । यसको विपरीत शहरी क्षेत्रमा भने सडकपेटीको जमीन कडा हुने भएकाले मापदण्डभन्दा केही कम गहिराइमा पोल जडान गर्दा तत्काल समस्या नदेखिने भए पनि ग्रामीण क्षेत्रमा भने यस्तो लापरवाहीले ठूलो जोखिम निम्त्याइरहेको छ ।
यसै साता आएको हावाहुरी र वर्षासँगै दुईपटक भएको घटनामा डेढ सयभन्दा बढी विद्युत् पोल ढलेका थिए । पोल ढल्दा तारहरू यत्रतत्र फैलिनुका साथै विद्युत् आपूर्तिमा अवरोध सिर्जना भएको थियो। यसले सर्वसाधारणलाई लामो समयसम्म अन्धकारमा बस्न बाध्य बनाएको छ ।
स्थानीयवासीका अनुसार ठेकेदारहरूले जानाजानी मापदण्ड उल्लङ्घन गर्दै कम गहिराइमा पोल गाड्ने गरेका छन्, जसका कारण पोल ढलेपछि मर्मतसम्भारको नाममा पुनः आर्थिक लाभ लिन सहज हुने गरेको आरोप समेत लागेको छ । यसरी एउटै कामबाट दोहोरो आम्दानी लिने प्रवृत्ति मौलाउँदै गएको उनीहरूको भनाइ छ ।
सम्बन्धित निकायले प्रभावकारी अनुगमन तथा कारबाही गर्न नसक्दा यस्ता अनियमितता दोहोरिँदै आएको देखिन्छ। प्राविधिक मापदण्डको कडाइका साथ पालना गराउन र दोषी ठेकेदारमाथि कारबाही गर्न स्थानीयवासीले माग गरेका छन्। अन्यथा यस्ता घटनाले भविष्यमा अझ ठूलो क्षति निम्त्याउने चेतावनीसमेत उनीहरूले दिएका छन् ।
