त्रिभुवन राजपथको मुख्य सडक विस्तारका लागि केन्द्रबिन्दु निर्धारण गर्ने कार्य वीरगंज क्षेत्रमा सम्पन्न भएको छ ।
गत मंगलबारदेखि सुरु गरिएको क्षेत्र निर्धारण गर्ने काम एक साताभित्र सकाइएको हो । डिभिजन सडक कार्यालय हेटौंडाका इन्जिनियर भोला साहका अनुसार गण्डकतर्फबाट सुरु गरिएको नापी मितेरी पुलसम्म आइपुग्दा करिब ८ किलोमिटर सडकको केन्द्रबिन्दु निर्धारण गरिएको हो । उक्त कार्यमा नापी कार्यालय वीरगंज, वीरगंज महानगरपालिका, जिल्ला प्रशासन कार्यालय पर्सा र जिल्ला प्रहरी कार्यालय पर्साका प्राविधिकसहितको संयुक्त टोली परिचालन गरिएको थियो ।
संयुक्त टोलीले राजपथको आधिकारिक मापदण्डअनुसार सडकको केन्द्र पहिचान गरी सो स्थानमा स्टिलका किला गाड्ने काम गरेको छ । मापदण्डअनुसार सडकको मध्यबिन्दुबाट दायाँबायाँ २५/२५ मिटर क्षेत्र मापन गरिएको इन्जिनियर भोला साहले बताए ।
यसअघि वैशाख ६ र ७ गते राजपथ विस्तारका क्रममा सडकछेउका करिब १ हजार २ सय संरचनामा डोजर चलाइए पनि वास्तविक केन्द्रबिन्दु स्पष्ट नभएकाले स्थानीय घरधनी अन्योलमा रहेका थिए । केन्द्रबिन्दु निर्धारण भएसँगै अब घरधनीहरूलाई आफ्नो संरचना कति हटाउनुपर्ने भन्ने स्पष्ट भएको छ ।
डिभिजन सडक कार्यालय हेटौंडाका अनुसार अब भत्किएका तथा हटाउन बाँकी संरचना सम्बन्धित घरधनीले आफैं हटाउनुपर्नेछ । हालसम्म संरचना हटाउन कुनै समयसीमा तोकिएको छैन । तर वीरगंज महानगरपालिकाले वैशाख २५ गतेभित्र हटाइसक्ने माइकिङ गराएका थिए ।
महानगरले २५ गते भित्र भत्किएका तथा हटाउन बाँकी संरचना सम्बन्धित घरधनीले आफैं हटाउनुपर्ने नभए महानगरले हटाए त्यसवापतकाे खर्च लाग्ने माइकिङ गराएकाे थियाे । त्रिभुवन राजपथको यस मुख्य सडककाे नापी कार्य सम्पन्न भएसँगै ६ लेनको राजमार्ग निर्माणका लागि डिजाइन र लागत अनुमान (इस्टिमेट) तयार गर्ने काम अघि बढाइने डिभिजन सडक कार्यालयले जनाएको छ ।
सुन्दर तथा आकर्षक सहरका लागि बजेट माग तथा स्मार्ट शहरको अवधारणा अगाडि बढाउने डिभिजन सडक कार्यालयले जनाएको छ ।
