डिभिजन वन कार्यालय पर्सा मातहतका सब डिभिजन वन कार्यालय तथा विन्ध्यवासिनी कोइलाभार साझेदारी वन उपभोक्ता समितिको सक्रियतामा सखुवाप्रसौनी गाउँपालिका–१ स्थित सखुवनिया टाँडी टोलमा अतिक्रमित वन क्षेत्र खाली गराइएको छ।
वन कार्यालयका अनुसार करिब ५० बिघा क्षेत्रफलमा फैलिएको अतिक्रमित जग्गामा डोजर चलाएर खाली गरिएको हो ।
उक्त क्षेत्रमा स्थानीय बासिन्दाले धान, मकै तथा तरकारी खेती गर्दै आएको पाइएको थियो। राष्ट्रिय वन र नम्बरी जग्गाबीचको सिमाना स्पष्ट गर्न तथा अतिक्रमण हटाउन संयुक्तरूपमा कारबाही गरिएको जनाइएको छ ।
विन्ध्यवासिनी कोइलाभार साझेदारी वन उपभोक्ता समितिका अध्यक्ष रिजवान अन्सारीका अनुसार अतिक्रमित क्षेत्रको पहिचान गरी वन क्षेत्र र नम्बरी जग्गाको सिमाना छुट्याउने काम गरिएको हो । उनका अनुसार खाली गरिएको क्षेत्रमा ट्रेन्च (खाडल) खनेर सिमाना स्पष्ट पारिएको छ। साथै भविष्यमा पुनः अतिक्रमण हुन नदिन आवश्यक कदम चालिने उनले बताए ।
उनले साझेदारी वन क्षेत्रभित्र पर्ने अतिक्रमित जग्गा खाली गराउने अभियान निरन्तर जारी रहने जानकारी दिए ।
सब डिभिजन वन कार्यालय सखुवनियाका रेन्जर विजय यादवले दुईवटा डोजर प्रयोग गरी अतिक्रमित जग्गा खाली गरिएको बताए । उनका अनुसार खाली गरिएको क्षेत्रमा केही दिनभित्रै तारबार लगाएर संरक्षण गरिनेछ, जसले वन क्षेत्र सुरक्षित बनाउन सहयोग पुग्नेछ ।
अतिक्रमण हटाउने कार्यमा वन अधिकृत उज्ज्वल यादव, वनगस्ती टोली, साझेदारी वनका प्रतिनिधिहरू तथा इलाका प्रहरी कार्यालय पटेर्वासुगौलीका प्रहरी निरीक्षक समुन्नत अधिकारीसहितको प्रहरी टोली खटिएको थियो । सुरक्षाकर्मीको उपस्थितिमा शान्तिपूर्ण रूपमा कारबाही सम्पन्न भएको जनाइएको छ ।
वन कार्यालयले सार्वजनिक वन क्षेत्र संरक्षणलाई प्राथमिकतामा राख्दै अतिक्रमण हटाउने अभियानलाई अझ प्रभावकारी बनाइने जनाएको छ ।
