बारा । बाराको निजगढस्थित एक होटलमा बास बसेकी २५ वर्षीया युवतीको शंकास्पद मृत्यु भएको छ । निजगढ नगरपालिका–९ बुद्धचोकस्थित गुरुङ होटलको कोठामा घाइते अवस्थामा फेला परेकी निजगढ नगरपालिका–१२ निवासी सीता थिङको उपचारका क्रममा मृत्यु भएको प्रहरीले जनाएको छ ।
जिल्ला प्रहरी कार्यालय बाराका अनुसार वैशाख २५ गते राति करिब १० बजे थिङ होटलको कोठाभित्र घाइते अवस्थामा फेला परेकी थिइन् । घटनाको जानकारी प्राप्त हुनासाथ इलाका प्रहरी कार्यालय निजगढबाट खटिएको प्रहरी टोलीले उनलाई तत्काल सामुदायिक अस्पताल प्रसूति गृह पुर्याएको थियो । तर, अस्पताल पुर्याएलगत्तै चिकित्सकले मृत घोषणा गरेका थिए ।
घटनाका बेला मृतक थिङसँगै सोही होटलको कोठामा निजगढ–९ निवासी १८ वर्षीया अनु सुनार रहेको प्रहरीले जनाएको छ । उनीहरूसँगै आएका अन्य दुई युवक भने घटनालगत्तै फरार भएका थिए ।
फरार हुनेहरूमा जितपुर सिमरा उपमहानगरपालिका–१६ टाँगिया बस्ती निवासी ३५ वर्षीय महेश माझी र ३६ वर्षीय सुनिल बोम्जन रहेका थिए ।
प्रहरीका अनुसार फरार व्यक्तिहरूको खोजीका लागि जिल्ला प्रहरी कार्यालय बाराबाट प्रहरी उपरीक्षकको नेतृत्वमा टोली परिचालन गरिएको थियो । इलाका प्रहरी कार्यालय निजगढको टोलीले प्राविधिक विश्लेषणसहित खोजी अभियान सञ्चालन गरेको जनाएको छ ।
खोजीका क्रममा प्रहरीले सुनिल बोम्जनलाई राति १ बजे टाँगिया बस्ती नजिकैको जंगल क्षेत्रबाट तथा महेश माझीलाई राति ४ बजे निजगढ–७ माझीटोलबाट पक्राउ गरेको थियो ।
पक्राउ परेका दुवै जनालाई नियन्त्रणमा लिएर घटनाबारे थप अनुसन्धान भइरहेको जिल्ला प्रहरी कार्यालय बाराका प्रवक्ता तथा प्रहरी नायब उपरीक्षक विजयराज पण्डितले जानकारी दिएका छन् ।
