इलाका प्रहरी कार्यालय, पटेर्वासुगौली र प्रहरी चौकी रङपुरटाँडीको संयुक्त आयोजनामा प्रहरी चौकी रङपुरमा नागरिक सुनुवाइ कार्यक्रम सम्पन्न भएको छ ।
समुदायसँग प्रत्यक्ष संवाद स्थापना गर्दै शान्ति–सुरक्षा सुदृढीकरण, सामाजिक विकृति नियन्त्रण तथा लागूऔषध दुव्र्यसन न्यूनीकरणका लागि साझा पहल गर्ने उद्देश्यले कार्यक्रम आयोजना गरिएको हो ।
कार्यक्रमका प्रमुख अतिथि इलाका प्रहरी कार्यालय, पटेर्वासुगौलीका प्रहरी निरीक्षक समुन्नत अधिकारीले नागरिकको सुरक्षा नै प्रहरीको पहिलो दायित्व भएको उल्लेख गर्दै प्रहरी सेवालाई थप प्रभावकारी, जवाफदेही र जनमुखी बनाउन आफूहरू निरन्तर सक्रिय रहेको बताए । उनले प्रहरी र समुदायबीचको सम्बन्ध विश्वास, सहकार्य र पारदर्शितामा आधारित हुनुपर्नेमा जोड दिँदै नागरिकलाई आफ्ना गुनासा र सुझाव खुला रूपमा राख्न आग्रह गरे ।
निरीक्षक अधिकारीले सीमित स्रोतसाधन, विस्तृत कार्यक्षेत्र तथा ग्रामीण सडक सञ्जालका चुनौतीका बाबजुद प्रहरीले आफ्नो जिम्मेवारी इमानदारितापूर्वक निर्वाह गरिरहेको बताए । पछिल्लो समय युवापुस्तामा लागूऔषध दुव्र्यसन, सडक अनुशासनको अभाव तथा विभिन्न सामाजिक विकृतिले समस्या सिर्जना गरिरहेको उल्लेख गर्दै उनले यसविरुद्ध विशेष अभियान सञ्चालन भइरहेको जानकारी दिए ।
उनले हालै सञ्चालन गरिएको ‘नो हेल्मेट, नो राइड’ अभियानले ट्राफिक सचेतनामा सकारात्मक प्रभाव पारेको बताउँदै आगामी दिनमा लागूऔषध नियन्त्रण, किशोरकिशोरी लक्षित जनचेतनामूलक कार्यक्रम, विद्यालयस्तरीय अभियान तथा समुदायमा निगरानी संयन्त्र विस्तार गरिने जानकारी दिए।
कार्यक्रममा प्रहरी चौकी रङपुरका प्रहरी सहायक निरीक्षक हर्कबहादुर श्रेष्ठले स्थानीय तहमा प्रहरी–नागरिक समन्वयलाई अझ प्रभावकारी बनाउने प्रतिबद्धता व्यक्त गरे ।
सखुवाप्रसौनी गाउँपालिकाका वडाध्यक्ष चिरञ्जीवी महतो थारूले पछिल्लो समय युवामाझ लागूऔषध सेवनको प्रवृत्ति चिन्ताजनक रूपमा बढ्दै गएको बताए । गाउँघरमै ससाना पुडियामा लागूऔषध बिक्री गर्ने समूह सक्रिय रहेको उल्लेख गर्दै उनले यस्ता गतिविधिमा संलग्नलाई कानुनी दायरामा ल्याउन प्रहरी प्रशासनले कडाइ गर्नुपर्नेमा जोड दिए ।
पूर्वशिक्षक महेन्द्र चौधरीले भौरीमाई जङ्गल आसपासका क्षेत्रमा विद्यालय उमेरका विद्यार्थीहरू टिफिन समयमा भेला भएर गाँजा सेवन गर्ने, दुव्र्यवहार गर्ने तथा रोक्न खोज्दा धम्की दिने घटनाहरू बढ्दै गएको गुनासो गरे । उनले विद्यालय क्षेत्रलाई सुरक्षित बनाउन तत्काल निगरानी बढाउनुपर्ने आवश्यकता औंल्याए ।
दीपनारायण आदर्श नमूना माध्यमिक विद्यालयका प्रधानाध्यापक शिवनाथप्रसाद थारू, वडा सदस्य सजिना रसाइली, स्थानीयवासी शत्रुघ्न साह, दीपक रसाइली, शिवनाथ थारू, स्वास्थ्यकर्मी इन्द्रजीत गौरवलगायत जनप्रतिनिधि, शिक्षक, युवा, समाजसेवी तथा सरोकारवालाहरूले पनि धारणा, गुनासा र सुझाव प्रस्तुत गरेका थिए ।
