पर्सागढी नगरपालिकाअन्तर्गत जीतपुरको टेढारोडदेखि पश्चिमतर्फ रङपुर बजारसम्म गरिएको कालोपत्र सडक मर्मत कार्य केही महिनामै भत्किन थालेपछि स्थानीयवासी आक्रोशित बनेका छन् ।
सडक जीर्ण बन्दै गएपछि यात्रु तथा सवारी चालकले दैनिक सास्ती खेप्नुपरेको छ । स्थानीयका अनुसार सडकका भत्किएका स्थानमा बेला–बेला वीरगंज महानगरपालिकाले आफ्नो क्षेत्रअन्तर्गत पर्ने भागमा माटो तथा ग्राभेल हालेर अस्थायी रूपमा पुर्ने काम गर्दै आएको छ । तर दीर्घकालीन समाधान नहुँदा समस्या यथावत् रहेको उनीहरूको गुनासो छ ।
नगरप्रमुख गोकर्ण पाठक निर्वाचित भएपछि पर्सागढी नगरपालिका क्षेत्रभित्र पर्ने जनता सडकअन्तर्गत जीर्ण कालोपत्र सडक मर्मत गरिएको थियो । तर मर्मत सम्पन्न भएको केही समय नबित्दै सडक पुनः पुरानै अवस्थामा फर्किएको स्थानीयहरूको भनाइ छ । सडकका विभिन्न स्थानमा खाल्डाखुल्डी बढेका कारण मोटरसाइकल एकापसमा ठोक्किने तथा दुर्घटना हुने घटनासमेत बढ्न थालेको बताइएको छ ।
स्थानीयवासीले नगरपालिकाले गुणस्तरहीन सामग्री प्रयोग गरी हतारमा कालोपत्र गरेको आरोप लगाएका छन् । उनीहरूका अनुसार सस्तो लोकप्रियता कमाउने उद्देश्यले गरिएको काम दिगो हुन सकेन । सडक मर्मतको गुणस्तर तथा छिट्टै बिग्रिएको विषयमा नगरप्रमुख पाठकसँग प्रतिक्रिया लिन खोज्दा उनले प्रतिक्रिया दिन अस्वीकार गरेका थिए ।
चार महिना अघि मात्रै सात लाख रुपैयाँ लागतमा भेडाहादेखि मनवासम्म करिब सात किलोमिटर सडक मर्मत गरिएको थियो । तर मर्मत सम्पन्न भएको चार महिना नबित्दै सडक पुनः पूर्ववत् अवस्थामा पुगेपछि कामको गुणस्तरमाथि प्रश्न उठेको छ । उक्त सडक खण्ड २०६८/६९ सालमा निर्माण गरिएको थियो ।
यसैबीच, स्थानीयवासीले नगरपालिकाको समग्र विकास कार्यप्रति समेत असन्तुष्टि व्यक्त गरेका छन् । उनीहरूका अनुसार नगरप्रमुखले शिक्षा, स्वास्थ्य तथा कृषिमा सुधार गर्ने प्रतिबद्धता जनाए पनि व्यवहारमा प्रभावकारी काम हुन सकेको छैन ।
शिक्षासम्बन्धी कार्यक्रम आफ्ना आफन्त तथा निकट व्यक्तिमुखी भएको आरोपसमेत स्थानीयको छ । त्यसैगरी, स्वास्थ्य संस्थाहरूमा आवश्यक औषधिको अभाव रहेको तथा किसानहरूले समयमा मलखाद नपाएको गुनासो बढ्दो छ ।
स्थानीयले नगरपालिकाले दीर्घकालीन योजना बनाएर गुणस्तरीय विकास निर्माणमा ध्यान दिनुपर्ने माग गरेका छन् ।
