कोशी प्रदेश मा लागुऔषध तथा गाँजा ओसारपसारका लागि एम्बुलेन्सको दुरुपयोग बढ्दै गएको छ । बिरामी बोकेर अस्पताल पुर्याउन प्रयोग हुने एम्बुलेन्सलाई तस्करहरूले पछिल्लो समय गाँजा ओसारपसारमा प्रयोग गर्न थालेको देखिएपछि सुरक्षा निकायहरू चकित बनेका छन् ।
प्रहरीका अनुसार हालै धरान क्षेत्रमा एउटा एम्बुलेन्सबाट ४४० किलो तयारी गाँजा बरामद गरिएको छ । भेडेटार नजिक धरान–४ स्थित थाउजेन्डस् बिगबुद्ध जाने कच्ची सडक किनारमा रोकिएको अवस्थामा सो एम्बुलेन्सबाट प्लास्टिकमा पोको पारिएको गाँजा फेला परेको हो ।
धरान–१८ स्थित बुढासुब्बा डाइग्नोस्टिक सेन्टर प्रालिद्वारा सञ्चालित को१च ७३५९ नम्बरको एम्बुलेन्समा गाँजा भेटिए पनि चालक भने फरार रहेको प्रहरीले जनाएको छ । चालकले प्रहरीलाई झुक्याउँदै भेडेटार नाका पार गरे पनि धरान प्रवेश गर्ने क्रममा प्रहरीको निगरानीपछि एम्बुलेन्स छाडेर फरार भएको बताइएको छ ।
यसअघि पनि कोशी प्रदेशमा एम्बुलेन्स प्रयोग गरेर गाँजा तस्करीका घटनाहरू दोहोरिँदै आएका छन् । केही महिनाअघि भेडेटार नाकामा रोकिएको एम्बुलेन्सबाट ४५० किलोभन्दा बढी गाँजा बरामद भएको थियो भने मोरङको केरावारी क्षेत्रमा एम्बुलेन्सबाट ५२१ किलो गाँजा बरामद गर्ने क्रममा प्रहरीले हवाई फायरसमेत गर्नुपरेको थियो ।
प्रहरीका अनुसार धनकुटा क्षेत्रमा उत्पादन हुने गाँजा सुनसरी, मोरङ हुँदै भारतीय बजारसम्म पुर्याउने क्रममा एम्बुलेन्स र अन्य सवारी साधन प्रयोग हुने गरेको देखिएको छ । कोशी प्रदेश प्रहरी कार्यालयका प्रवक्ता प्रहरी वरिष्ठ उपरीक्षक (एसएसपी) योगेन्द्रसिंह थापाका अनुसार एम्बुलेन्सलाई प्रहरीले सामान्यतया कम चेकजाँच गर्ने भएकाले तस्करहरूले त्यसको दुरुपयोग गर्ने गरेका छन् ।
त्यसैगरी भारतसँग जोडिएका सीमावर्ती क्षेत्रमा भारतीय नम्बर प्लेटका एम्बुलेन्स तथा सवारी साधनसमेत गाँजा तस्करीमा प्रयोग हुने गरेको प्रहरीले जनाएको छ । पछिल्ला घटनाहरूले लागुऔषध नियन्त्रणमा थप चुनौती बढाएको प्रहरीको भनाइ छ ।
