वीरगंजस्थित सशस्त्र प्रहरी बल नेपाल अन्तर्गत सीमा सुरक्षा गुल्म हे.क्वा. वीरगंज, पर्सा र ग्रीनसिटी सामुदायिक प्रहरी आदर्शनगर को संयुक्त आयोजनामा लागू औषध दुर्व्यसन रोकथाम तथा नियन्त्रण सम्बन्धी सचेतना कार्यक्रम सम्पन्न भएको छ ।
वीरगंज–रक्सौल मितेरीपुल क्षेत्रमा दैनिक आवतजावत गर्ने अटो रिक्सा चालकहरूलाई लक्षित गरी आयोजित कार्यक्रममा लागू औषधको दुष्प्रभाव, सामाजिक असर तथा नियन्त्रणका उपायबारे विस्तृत जानकारी प्रदान गरिएको थियो ।
कार्यक्रम बिकाश अधिकारी को प्रमुख आतिथ्यमा सम्पन्न भएको हो भने जयप्रकाश खेतान को अध्यक्षता रहेको थियो ।
कार्यक्रममा भारतीय एसएसबीका जवान, सामुदायिक प्रहरीका पदाधिकारी तथा अटो रिक्सा चालकहरूको उल्लेखनीय उपस्थिति रहेको थियो ।
कार्यक्रमलाई सम्बोधन गर्दै डिएसपी अधिकारीले लागू औषध दुर्व्यसन समाजका लागि गम्भीर चुनौती बन्दै गएको उल्लेख गर्दै सीमावर्ती क्षेत्रमा सचेतना अभिवृद्धि गर्नु अत्यन्त आवश्यक रहेको बताए । उनले अटो चालकहरू समाजसँग प्रत्यक्ष जोडिने भएकाले लागू औषध नियन्त्रण अभियानमा उनीहरूको भूमिका महत्वपूर्ण हुने धारणा व्यक्त गरे ।
त्यसैगरी अध्यक्ष खेतानले युवापुस्तालाई दुर्व्यसनबाट जोगाउन समुदाय, प्रहरी तथा सरोकारवाला निकायबीच सहकार्य आवश्यक रहेको बताए । उनले समाजलाई सुरक्षित, स्वस्थ र सभ्य बनाउन यस्ता जनचेतनामूलक कार्यक्रमलाई निरन्तरता दिइने जानकारी दिए ।
कार्यक्रममा सहभागी अटो रिक्सा चालकहरूलाई लागू औषध सेवन तथा ओसारपसारका कानुनी परिणाम, स्वास्थ्यमा पर्ने असर तथा सामाजिक दुष्परिणामबारे जानकारी गराइएको थियो । साथै कुनै पनि शंकास्पद गतिविधि देखिएमा तत्काल प्रहरीलाई जानकारी गराउन आग्रह गरिएको आयोजकले जनाएको छ ।
वीरगंज मितेरीपुल क्षेत्रमा आयोजित उक्त कार्यक्रमप्रति सहभागीहरूले सकारात्मक प्रतिक्रिया दिएका थिए।
