वीरगंज महानगरपालिका लाई सुन्दर, व्यवस्थित तथा राष्ट्रिय–अन्तर्राष्ट्रिय स्तरमा चिनाउने उद्देश्यले सञ्चालन गरिएको सडक विस्तार अभियान अहिले सर्वसाधारणका लागि सास्तीको विषय बनेको छ ।
गण्डकदेखि घण्टाघरसम्म सडक अतिक्रमण गरी निर्माण गरिएका संरचना हटाउने काम तीव्र रूपमा अघि बढे पनि त्यसपछि उत्पन्न अव्यवस्था र फोहर व्यवस्थापनको अभावले शहर अस्तव्यस्त बनेको स्थानीयवासीले गुनासो गरेका छन् । सडक विस्तारका क्रममा केही घरधनीले आफ्ना घर तथा सटर आफैं भत्काइरहेका छन् भने केही स्थानमा आधा भत्किएका संरचना अलपत्र अवस्थामा छन् । निर्माण सामग्री, इँटा, बालुवा तथा भत्काइएका संरचनाका अवशेष सडक किनारमै थुपारिँदा शहरको सौन्दर्य मात्र बिग्रिएको छैन, आवागमनसमेत जोखिमपूर्ण बनेको छ । विशेषगरी घण्टाघरदेखि मितेरी पुलसम्मको क्षेत्र धूलाम्मे र अस्तव्यस्त देखिएको छ ।
हावा चल्नेबित्तिकै उड्ने धूलोका कारण पैदलयात्री, व्यवसायी तथा सवारी चालक प्रभावित भएका छन् । स्थानीयका अनुसार धूलो र फोहरका कारण दैनिक जीवन कष्टकर बन्दै गएको छ । अव्यवस्थित रूपमा राखिएका निर्माण सामग्री र खाल्डाखुल्डीले साना तथा ठूला दुर्घटनाको जोखिम बढाएको जिल्ला ट्राफिक प्रहरी कार्यालय पर्सा ले जनाएको छ ।
यसअघि सडक डिभिजन कार्यालय हेटौंडाले सडकको दायाँ–बायाँ २५/२५ मिटर क्षेत्र खाली गराउने अभियान सुरु गरेको थियो । सोही अभियान अन्तर्गत अहिले संरचना हटाउने कार्य जारी रहेको हो । महानगर क्षेत्रको मुख्य सडक फराकिलो बनाउने योजना दीर्घकालीन रूपमा सकारात्मक मानिए पनि तत्कालीन व्यवस्थापन कमजोर हुँदा सर्वसाधारणले सास्ती भोग्नुपरेको स्थानीयको भनाइ छ ।
स्थानीय व्यवसायीहरूले सडक विस्तार आवश्यक भए पनि भत्काइएका संरचनाको फोहर तत्काल हटाउने, नियमित पानी छर्किने तथा वैकल्पिक ट्राफिक व्यवस्थापन गर्नुपर्ने माग गरेका छन् ।
महानगरवासीहरूले भने विकासका नाममा भइरहेको कामले शहर “युद्धग्रस्त क्षेत्रजस्तै” देखिन थालेको गुनासो गरेका छन् । यता महानगरपालिका र सम्बन्धित निकायले दीर्घकालीन रूपमा शहरलाई व्यवस्थित र आधुनिक बनाउने उद्देश्यले काम भइरहेको दाबी गरेका छन्, तर निर्माण कार्य र व्यवस्थापनबीच समन्वय नहुँदा समस्या बढ्दै गएको देखिएको छ ।
