मधेश प्रदेश का मुख्यमन्त्री कृष्ण प्रसाद यादव ले शुक्रबार प्रदेश सभाबाट विश्वासको मत प्राप्त गरेका छन् ।
प्रदेश सभा सचिवालयका अनुसार उनको पक्षमा ६२ मत परेको हो । सरकारमा सहभागी जनमत पार्टी ले समर्थन फिर्ता लिएपछि मुख्यमन्त्री यादवले विश्वासको मत लिनुपरेको थियो ।
जनमत पार्टीले अर्थमन्त्री महेश यादव र खेलकुद तथा समाजकल्याण मन्त्री वसन्त कुशवाहालाई हटाउन दबाब दिएको थियो । तर मुख्यमन्त्री यादवले त्यसमा चासो नदेखाएपछि जनमत पार्टीले संसदीय दलको नेतृत्व परिवर्तन गर्दै सरकारलाई दिएको समर्थन फिर्ता लिएको थियो ।
विश्वासको मतका क्रममा सरकारलाई नेपाली कांग्रेस का २२, नेकपा एमाले का २४, नेकपा (माओवादी केन्द्र) का १५ तथा संघीय समाजवादी पार्टीकी एक सांसदले समर्थन गरेका थिए । प्रदेश सभामा हाल १०३ सदस्य रहेकामा जसपा नेपालका दुई सांसद निलम्बनमा छन् । कुल ९९ सदस्य उपस्थित रहेको बैठकमा उपसभामुखले मतदानमा भाग लिइनन् ।
जनमत पार्टी का ११ सांसदमध्ये १० जनाले सरकारको विपक्षमा मतदान गरेका थिए । सरकारको पक्षमा रहेका अर्थमन्त्री महेश यादव र खेलकुद तथा समाजकल्याण मन्त्री वसन्त कुशवाहाले पनि विपक्षमै मतदान गरे । उनीहरूलाई मुख्यमन्त्री यादवले बिहीबार राति मन्त्रिपरिषद् पुनर्गठन गर्दै सरकारबाट हटाएका थिए ।
यसअघि जसपा नेपाल को संसदीय दलको बैठकले सरकारको पक्षमा मतदान गर्न ह्विप जारी गरेको थियो । तर मुख्यमन्त्री यादवले जसपालाई सरकारबाट हटाएपछि पार्टीले विश्वासको मतको विपक्षमा मतदान गर्ने निर्णय गरेको जसपाका नेता मनिष सुमनले बताएका थिए ।
मधेश प्रदेशको दोस्रो कार्यकालमा कृष्ण प्रसाद यादव पाँचौं मुख्यमन्त्री बनेका हुन् । यसअघि जसपा नेपालका सरोजकुमार यादव, जनमत पार्टीका सतीशकुमार सिंह, लोकतान्त्रिक समाजवादी पार्टी का जितेन्द्र सोनल तथा एमालेका सरोजकुमार यादव मुख्यमन्त्री बनेका थिए । त्यसमध्ये सोनल र सरोजकुमार यादवको कार्यकाल करिब एक महिनामै सीमित भएको थियो ।
प्रदेशको पछिल्लो राजनीतिक समीकरणमा नेकपा एमाले ले पुनः सशक्त उपस्थितिसहित सरकारमा कमब्याक गरेको छ । एमाले नेतृत्वसँग सरकार गठन गर्न अनिच्छुक रहेका मधेश केन्द्रित दलहरूलाई बाहिर राख्दै नयाँ समीकरण बनेको हो । एमाले स्रोतका अनुसार मो. समिमलाई विनाविभागीय मन्त्री नियुक्त गर्ने तयारी भएको छ भने उनी भौतिक पूर्वाधार विकास मन्त्री बन्ने सम्भावना रहेको बताइएको छ । त्यसैगरी धनुषाबाट हरिनारायण महतो र सिरहाबाट मनोज सिंहलाई पनि मन्त्री बनाउने चर्चा छ ।
उता नेपाली कांग्रेस भित्र पनि मन्त्रिपरिषद् हेरफेरको तयारी भइरहेको छ । स्वास्थ्य मन्त्री जंगीलाल रायको स्थानमा वीरेन्द्र सिंहलाई ल्याउने सहमति भएको स्रोतले जनाएको छ ।
सरकार गठनका बेला पुराना अनुहार नदोहो¥याउने सहमति भए पनि त्यसको कार्यान्वयन हुने सम्भावना कमजोर देखिएको छ । बजेट निर्माणको अन्तिम चरणमा एमालेले भौतिक पूर्वाधार विकास, शिक्षा तथा श्रम तथा यातायात मन्त्रालयसहित सरकारमा प्रभावशाली उपस्थिति बनाएको छ ।
छ महिनासम्म सरकारमा रहेका मधेश केन्द्रित दलहरू बजेट निर्माणकै समयमा सरकारबाट बाहिरिएका छन् । पछिल्लो समय जसपा नेपाल र लोसपाबीच एकीकरण भइसकेको छ भने जनमत पार्टीसँग पनि एकीकरणको गृहकार्य भइरहेको बताइएको छ ।
