विश्व हिन्दू परिषद् नेपालले नेपाल हिन्दू पत्रकार संघलाई ३० थान ज्याकेट हस्तान्तरण गरेको छ । शनिबार वीरगंजस्थित माईस्थान अतिथि सदनको सभाहलमा आयोजित विशेष कार्यक्रममा उक्त सामग्री हस्तान्तरण गरिएको हो ।
कार्यक्रममा विश्व हिन्दू परिषद् वीरगंज महानगर कमिटीका अध्यक्ष ज्योति रुङ्गटाले हिन्दू पत्रकार संघ नेपालका अध्यक्ष राजन रौनियारलाई ज्याकेट हस्तान्तरण गर्नुभएको थियो । कार्यक्रममा सहभागी पत्रकार संघका पदाधिकारी, सदस्य तथा सल्लाहकारहरूलाई ज्याकेट लगाइदिएर सम्मानसमेत गरिएको थियो ।
सोही अवसरमा लामो समयदेखि वीरगंजमा सक्रिय पत्रकारिता गर्दै आएका पत्रकार दीपक चौरसियालाई हिन्दू पत्रकार संघमा आबद्ध गराइएको छ । उनलाई संघका अध्यक्ष राजन रौनियार र सचिव राज सराफले संगठनको प्रेस ज्याकेट लगाइदिएर स्वागत गरेका थिए ।
कार्यक्रममा बोल्दै विश्व हिन्दू परिषद् वीरगंज महानगर कमिटीका अध्यक्ष ज्योति रुङ्गटाले पत्रकारहरूको सुरक्षा र पहिचानमा सहयोग पुगोस् भन्ने उद्देश्यले ज्याकेट सहयोग गरिएको बताउनुभयो । उहाँले पत्रकारहरू समाज रूपान्तरणको अग्रपंक्तिमा रहने भएकाले उनीहरूको कार्यक्षेत्रलाई सहज बनाउन यस्तो सहयोग गरिएको उल्लेख गर्नुभयो ।
त्यसैगरी, ज्याकेट ग्रहण गर्दै हिन्दू पत्रकार संघका अध्यक्ष राजन रौनियारले परिषद्लाई धन्यवाद ज्ञापन गर्नुभयो । उहाँले पत्रकार दीपक चौरसियाको आबद्धताले संगठन थप सुदृढ हुने विश्वास व्यक्त गर्नुभयो ।
कार्यक्रम संघका अध्यक्ष राजन रौनियारको अध्यक्षतामा सम्पन्न भएको थियो भने सञ्चालन सचिव राज सराफले गर्नुभएको थियो । कार्यक्रममा स्थानीय पत्रकार, सञ्चारकर्मी तथा विभिन्न सामाजिक व्यक्तित्वहरूको उल्लेख्य उपस्थिति रहेको थियो ।
