कुटपिट तथा अंगभंग मुद्दामा पक्राउ पुर्जी जारी भएपछि सप्तरीको राजगढ गाउँपालिका–२ का वडाध्यक्ष जितेन्द्रकुमार यादव सम्पर्कविहीन भएका छन् ।
वडाध्यक्ष यादवसहित पाँच जनाविरुद्ध गत सोमबार पक्राउ पुर्जी जारी भएको थियो । पक्राउ पुर्जी जारी भएपछि यादवले मंगलबार वडा सदस्य सुमित्रादेवी खंगलाई निमित्त वडाध्यक्षको जिम्मेवारी तोकेर सम्पर्कविहीन बनेको जनाइएको छ ।
वडासचिव रामकुमार यादवले चार दिनअघि वडाध्यक्ष यादवले सुमित्रादेवी खंगलाई निमित्त वडाध्यक्षको जिम्मेवारी दिएको पुष्टि गर्नुभयो ।
गाउँपालिका अध्यक्ष ओमप्रकाश मण्डल ले तीन दिनअघि वडाध्यक्ष यादवसँग भेट भए पनि त्यसयता सम्पर्क हुन नसकेको बताउनुभयो। “उहाँमाथि रहेको मुद्दाका विषयमा सामान्य जानकारी छ,” उहाँले भन्नुभयो ।
जिल्ला प्रहरी कार्यालय सप्तरीका प्रवक्ता डीएसपी डम्बरबहादुर पुरी ले घटनाबारे अनुसन्धान भइरहेको जानकारी दिनुभयो ।
२०७१ कात्तिक २१ गते राजगढ गाउँपालिका–२ अन्तर्गत बनैनियाँस्थित सार्वजनिक जग्गामा घर निर्माण गर्ने विषयलाई लिएर विवाद भएको थियो । स्थानीय ललनकुमार सिंहलगायतले विरोध जनाएपछि वडाध्यक्ष यादवसहित शिवन खंग, टुनु खंग, पशुपति खंग र श्रीराम खंगले सिंहमाथि रड प्रहार गरेको आरोप छ ।
कुटपिटबाट ललनकुमार सिंहको हात भाँचिएको थियो । पीडित सिंहले २५ कात्तिक २०८१ मा जिल्ला प्रहरी कार्यालय सप्तरीमा कुटपिट तथा अंगभंगसम्बन्धी जाहेरी दिएका थिए। तर प्रहरीले जाहेरी दर्ता गर्न नमानेको आरोप लगाइएको छ ।
पछि सिंहले २०८१ माघ ९ गते जिल्ला सरकारी वकिल कार्यालयमार्फत पुनः जाहेरी पठाएका थिए। त्यसबेलासमेत प्रहरीले सनाखतलगायत कानुनी प्रक्रिया पूरा गर्न आनाकानी गरेको बताइएको छ ।
त्यसपछि सिंहले २०८१ चैत ५ गते उच्च अदालत जनकपुर, राजविराज इजलास मा परमादेशको रिट दायर गरेका थिए। रिटमाथिको सुनुवाइपछि २०८२ जेठ १४ गते न्यायाधीशद्वय पूर्णप्रसाद राजवंशी र कृष्णप्रसाद सुवेदीको संयुक्त इजलासले जिल्ला प्रहरी कार्यालय सप्तरीका नाममा न्याय प्रशासन ऐन, २०७३ को दफा ८(१) बमोजिम परमादेश जारी गरेको थियो ।
