मधेश प्रदेशमा विगत चार महिनादेखि एन्टिरेबिज (एआरभी) भ्याक्सिनको अभाव भएको छ । सरकारी अस्पतालमा निःशुल्क उपलब्ध हुनुपर्ने भ्याक्सिन नपाउँदा कुकुरले टोकेका बिरामीहरू निजी स्वास्थ्य संस्थाबाट महँगोमा खरिद गरेर लगाउन बाध्य भएका छन् ।
सरकारले मधेश प्रदेशका ४४ वटा अस्पताल तथा स्वास्थ्य संस्थामा भ्याक्सिन उपलब्ध गराउने व्यवस्था गरे पनि फागुन महिनादेखि कुनै पनि स्वास्थ्य संस्थामा आपूर्ति नभएको जनाइएको छ ।
सर्लाहीको लालबन्दी नगरपालिका–१६, परवानीपुरकी लक्ष्मी रायमाझीले ससुरालाई कुकुरले टोकेपछि नगर अस्पताल लालबन्दीमा भ्याक्सिन नपाउँदा बाहिरबाट खरिद गर्नुपरेको बताएकी छन् । निजी फार्मेसीमा एक डोज एन्टिरेबिज भ्याक्सिनको मूल्य ६ सयदेखि ७ सय रुपैयाँसम्म पर्ने गरेको छ ।
नगर अस्पताल लालबन्दीका मेडिकल सुपरिन्टेन्डेन्ट चन्दन चौधरी का अनुसार भ्याक्सिनको आपूर्ति लामो समयदेखि अनियमित हुँदै आएको र फागुनदेखि पूर्ण रूपमा बन्द भएको हो । उनले प्रदेश स्वास्थ्य आपूर्ति व्यवस्थापन केन्द्रबाट आउने कोटा अनुसार प्रतिमहिना १२० भाइल भ्याक्सिन अपेक्षित भए पनि कहिलेकाहीँ कम आउने र आएको पनि छिट्टै सकिने गरेको बताए । यस्तै, प्रादेशिक अस्पताल मलङ्गवाका निमित्त मेडिकल सुपरिन्टेन्डेन्ट रामप्रकाश साह ले भ्याक्सिन नहुँदा बिरामीहरूको गुनासो बढेको बताएका छन् ।
प्रदेश स्वास्थ्य आपूर्ति व्यवस्थापन केन्द्र जनकपुरका अनुसार मधेश प्रदेशका ४४ स्वास्थ्य संस्थाका लागि मासिक करिब ७,५०० भाइल भ्याक्सिन आवश्यक भए पनि संघीय सरकारले कहिलेकाहीँ २,००० देखि ५,००० भाइल मात्र पठाउने गरेको छ, जसले आपूर्ति अभाव बढाएको छ । प्रदेशले चालु आर्थिक वर्ष २०८२/८३ मा खरिद गरेको ७५९ भाइल भ्याक्सिन पनि केही दिनमै सकिएको जनाइएको छ । प्रदेश स्वास्थ्य आपूर्ति व्यवस्थापन केन्द्रका निमित्त निर्देशक नागेन्द्रप्रसाद यादव का अनुसार संघीय आपूर्ति नहुँदा मधेश प्रदेशभर नै एन्टिरेबिज भ्याक्सिनको चरम अभाव भएको छ ।
उनले यो समस्या केवल मधेशमा मात्र नभई देशभर नै देखिएको बताए ।
