सिम्रौनगढमा बाली क्षतिपूर्तिको माग गर्दै सिम्रौनगढका किसानहरूले मंगलबार नगरपालिका कार्यालयमा प्रदर्शन गरेका छन् । प्रदर्शनकारीहरूले नगरपालिकाको मुख्य गेटमा ताल्चा लगाएर धर्नासमेत दिएका छन् ।
गत वैशाख १४ गते राति आएको भीषण आँधी, पानी तथा असिना वर्षाका कारण सिम्रौनगढ क्षेत्रमा ठूलो मात्रामा बाली नष्ट भएको किसानहरूको भनाइ छ । उक्त विपद्बाट करिब ४०० जना कृषकको बाली पूर्णरूपमा क्षति पुगेको उनीहरूले बताएका छन् ।
पीडित किसानहरूले क्षतिपूर्तिका लागि पटक–पटक नगरपालिका कार्यालयमा माग गरे पनि सुनुवाइ नभएको आरोप लगाएका छन् । किसानहरूका अनुसार नगरप्रमुख किशोरीप्रसाद कलवारले आवश्यक कागजात बुझाउन आग्रह गरेपछि सबै प्रक्रिया पूरा गरे पनि राहत वितरणमा ढिलाइ भइरहेको छ ।
सिम्रौनगढ–२ रानीवासबाट सुरु भएको जुलुस अमृतगंज, जानकीनगर हुँदै नगर परिक्रमा गर्दै नगरपालिका कार्यालय पुगेको थियो । प्रदर्शनका क्रममा किसानहरूले नगरप्रमुख र वडाध्यक्षविरुद्ध नाराबाजी गरेका थिए । यस क्रममा सुरक्षाकर्मी र प्रदर्शनकारीबीच धक्कामुक्कीसमेत भएको जनाइएको छ ।
धर्नामा किसान संघर्ष समितिका अध्यक्ष ध्रुवप्रसाद कुशवाहाले कागजात बुझाइसक्दा पनि राहत नपाएको भन्दै आन्दोलन गर्न बाध्य भएको बताए । उनले माग पूरा नभएसम्म आन्दोलन जारी रहने चेतावनी दिएका छन् ।
नगरपालिकाभित्र कार्यपालिका बैठक जारी रहेका बेला नगरप्रमुख, उपप्रमुख, जनप्रतिनिधि र कर्मचारी कार्यालयभित्रै रोकिएका थिए । नगरप्रमुख कलवारले भने क्षतिपूर्तिका विषयमा छलफल भइरहेको बताएका छन् ।
संघर्ष समितिका सचिव रामप्रवेश कुशवाहाका अनुसार प्रारम्भमा ३००, त्यसपछि २८० र अन्तिममा २६० जना कृषकका कागजात स्वीकृत भई बुझाइएको छ । प्रतिकट्ठा पाँच हजार रुपैयाँका दरले राहत दिने सहमति भएको बताइएको छ ।
यता, केही कृषक कागजात अभावका कारण राहत सूचीबाट बाहिर परेका छन् भने बटैयामा खेती गर्ने जोतहाहरू सबैभन्दा बढी प्रभावित भएको गुनासो छ । घटनाका क्रममा एक जना महिला नगर प्रहरी घाइते भएकी छन् ।
