जनता समाजवादी पार्टी (जसपा) नेपालका अध्यक्ष उपेन्द्र यादवले प्रदेश खारेज गर्ने कुनै पनि प्रयास स्वीकार्य नहुने बताएका छन् ।
जसपा नेपाल सिरहाले शुक्रबार लहानमा आयोजना गरेको अन्तरक्रिया तथा अभिमुखीकरण कार्यक्रममा बोल्दै अध्यक्ष यादवले राष्ट्रिय स्वतन्त्र पार्टी (रास्वपा)लाई विचारविहीन पार्टीको संज्ञा दिँदै गणतन्त्र, सङ्घीयता र समावेशिताजस्ता उपलब्धिमाथि प्रहार भए जसपा नेपाल चुप लागेर नबस्ने चेतावनी दिए।
उनले जसपा नेपाल आफ्नो लक्ष्य पूरा नभएसम्म सङ्घर्षरत रहने पार्टी भएकाले एउटा निर्वाचनमा पराजित हुँदैमा निराश नहुन नेता–कार्यकर्तालाई आग्रह गरे। पार्टी संगठनलाई थप सुदृढ बनाउँदै आगामी राजनीतिक सङ्घर्षका लागि तयारी अवस्थामा रहन उनले निर्देशन दिए।
गत निर्वाचनमा पार्टीलाई धोका दिने नेता–कार्यकर्तालाई अब पार्टीमा स्थान र महत्त्व दिन नहुने उल्लेख गर्दै यादवले इमानदार युवा, महिला र दलितलाई प्राथमिकतामा राखेर पार्टीलाई अघि बढाउनुपर्ने धारणा व्यक्त गरे ।
उनले गाउँदेखि जिल्लासम्म पार्टीको पुनर्गठन गर्दै प्रशिक्षण सञ्चालन गर्नुपर्ने र सामाजिक सञ्जालको प्रभावकारी प्रयोगमार्फत पार्टीको प्रचार–प्रसारलाई तीव्र बनाउनुपर्ने बताए । सामाजिक सञ्जालमा सक्रिय हुन नसक्ने नेता–कार्यकर्ताले पनि पार्टीका विचार र गतिविधि प्रचारप्रसारमा सहयोग गर्नुपर्ने उनको भनाइ थियो । अध्यक्ष यादवले आगामी स्थानीय तह र प्रदेश निर्वाचनको तयारीमा अहिलेबाटै सक्रिय हुन नेता–कार्यकर्तालाई आग्रह गर्दै वर्ग, वर्ण, समाजवाद र सामाजिक न्यायका मुद्दा जनस्तरसम्म पुर्याउनुपर्ने बताए ।
उनले विगत ३४ वर्षमा ३० वटा सरकार गठन भए पनि जनतामा निराशा बढेको उल्लेख गर्दै व्यवस्था परिवर्तन भए पनि जनजीवनमा अपेक्षित सुधार हुन नसकेकाले पुराना दलप्रतिको जनविश्वास घटेको दाबी गरे । सुशासन, विकास, सामाजिक न्याय तथा गणतन्त्र र सङ्घीयताको रक्षाका लागि जसपा नेपाल एकताबद्ध भएर अघि बढ्नुको विकल्प नरहेको उनको भनाइ थियो ।
कार्यक्रममा सिरहा जिल्लामा पार्टीले व्यहोरेको निर्वाचन हार र त्यसका कारणबारे जिल्ला तहका नेताहरूले धारणा राखेका थिए। उनीहरूले पार्टीबाट निर्वाचित जनप्रतिनिधि तथा मधेश सरकारमा पार्टीको नेतृत्व हुँदा जनअपेक्षाअनुसार काम हुन नसकेको, विशेषगरी किसानलाई राहत दिने प्रभावकारी कार्यक्रम सञ्चालन हुन नसकेको गुनासो गरेका थिए ।
