धनुषाको लक्ष्मीनिया गाउँपालिकास्थित जानकी प्लास्टिक उद्योगले प्रतिष्ठित मार्वल कम्पनीको नाम र ट्रेडमार्क प्रयोग गरी नक्कली बोरवेल (प्लास्टिक) पाइप उत्पादन तथा बिक्री गर्दै आएको आरोप लागेको छ ।
प्रहरीले सिरहाबाट ठूलो परिमाणमा मार्वल ब्रान्डको नाम र लोगो अंकित पाइप बरामद गर्दै एक व्यवसायीलाई पक्राउ गरेको छ भने घटनामा संलग्न अन्य व्यक्ति तथा आपूर्ति सञ्जालबारे अनुसन्धान अघि बढाएको जनाएको छ ।
जिल्ला प्रहरी कार्यालय सिरहाबाट खटिएको विशेष प्रहरी टोलीले गोलबजार नगरपालिका–४ स्थित नेहाल आइरन स्टोरमा छापा मारेर विभिन्न आकारका ६ सय ३२ थान बोरवेल पाइप बरामद गरेको हो । बरामद पाइपमा मार्वल कम्पनीको नाम र लोगो प्रयोग गरिएको पाइएको प्रहरीले जनाएको छ ।
जिल्ला प्रहरी कार्यालय सिरहाका सूचना अधिकारी तथा प्रहरी नायव उपरीक्षक (डीएसपी) रमेशबहादुर पालका अनुसार ११४ एमएम, ११० एमएम र ९० एमएम साइजका पाइप बरामद गरिएको छ । उनले नेहाल आइरन स्टोरका सञ्चालक सिरहा नगरपालिका–२० लकडीगोठ निवासी ४५ वर्षीय मोहम्मद साबिर खानलाई नियन्त्रणमा लिइएको र घटनामा थप अनुसन्धान भइरहेको जानकारी दिए ।
प्रहरीका अनुसार प्रारम्भिक अनुसन्धानका क्रममा पक्राउ परेका व्यवसायीले मार्वल कम्पनीको नाम र लोगो अंकित पाइप बिक्री गरेको स्वीकार गरेका छन् । बरामद पाइप कम्पनीका आधिकारिक उत्पादन नभएको कम्पनीका प्रतिनिधिले प्रारम्भिक परीक्षणपछि जनाएको प्रहरीले उल्लेख गरेको छ ।
डीएसपी पालका अनुसार उपभोक्ता ठगी तथा ट्रेडमार्क उल्लंघनसम्बन्धी कसुरमा आवश्यक कानुनी प्रक्रिया अघि बढाइएको छ । घटनामा अन्य संलग्न व्यक्ति तथा पाइप उत्पादन गर्ने उद्योग र वितरण सञ्जालबारे समेत अनुसन्धान भइरहेको उनले बताए । हालसम्म एक जनालाई मात्र नियन्त्रणमा लिइएको भए पनि करिब १० जनालाई अनुसन्धानको दायरामा राखिएको प्रहरी स्रोतले जनाएको छ ।
मार्वल टेक्नो प्लास्टका मार्केटिङ म्यानेजर सुदीप न्यौपानेले करिब तीन वर्षदेखि कम्पनीको नाम र ब्रान्डिङ दुरुपयोग गरी नक्कली पाइप बिक्री हुँदै आएको आरोप लगाए । उनका अनुसार मधेश प्रदेशमा बजार अनुगमनका क्रममा उपभोक्ताले आफूहरूले मार्वल ब्रान्डकै पाइप प्रयोग गरिरहेको जानकारी दिएपछि कम्पनीले आफ्नो बिक्री अभिलेखसँग तुलना गरेको थियो । त्यस क्रममा उक्त क्षेत्रमा कम्पनीबाट कुनै आधिकारिक आपूर्ति नभएको देखिएपछि थप अनुसन्धान गर्दा कम्पनीकै नाम र लोगो प्रयोग गरिएका पाइप बिक्री भइरहेको फेला परेको उनले दाबी गरे ।
न्यौपानेले यसअघि पनि सम्बन्धित व्यवसायीलाई मौखिक रूपमा यस्तो गतिविधि नगर्न सचेत गराइएको भए पनि पुनः उही कार्य दोहोरिएको पाइएपछि कानुनअनुसार कारबाही प्रक्रिया अघि बढाइएको बताए । नक्कली ब्रान्डिङ भएका उत्पादनको कारोबारले कम्पनीको प्रतिष्ठा, उपभोक्ताको विश्वास तथा सुरक्षामा समेत असर पुग्ने उनको भनाइ छ ।
प्रहरी हिरासतमा रहेका नेहाल आइरन स्टोरका सञ्चालक मोहम्मद साबिर खानले भने आफूले उक्त पाइप धनुषाको लक्ष्मीनिया गाउँपालिकास्थित जानकी प्लास्टिक उद्योगबाट खरिद गरेको दाबी गरेका छन् । यसैबीच प्रहरीले शनिबार साँझ जानकी प्लास्टिक उद्योगमा पनि अनुसन्धानका लागि पुगेको जनाएको छ । उद्योगमा थप अनुसन्धान भइरहेको र आवश्यक प्रमाण संकलन गर्ने काम जारी रहेको प्रहरीले जनाएको छ ।
सामाजिक सञ्जाल तथा केही माध्यममा उद्योगबाट सामान अन्यत्र सारिएको, प्रहरीको संरक्षणमा सामान हटाइएको तथा उद्योग सञ्चालिका अनिता अग्रवाल फरार भएको भन्ने दाबी सार्वजनिक भए पनि यी विषयको स्वतन्त्र पुष्टि भएको छैन । जिल्ला प्रहरी कार्यालयले यस्ता दाबीबारे औपचारिक पुष्टि नगरेको र अनुसन्धान जारी रहेको जनाएको छ ।
प्रहरीले घटनामा संलग्न सबै व्यक्ति तथा नक्कली ब्रान्डिङ गरिएको पाइपको उत्पादन र वितरणमा संलग्न सञ्जालबारे विस्तृत अनुसन्धान भइरहेको जनाएको छ ।
