महोत्तरीको जलेश्वर–जनकपुर सडकखण्डअन्तर्गत पर्सा र पिपराबीच निर्माणाधीन कुटमेश्वरी पुलका कारण सर्वसाधारणले सास्ती खेप्दै आएका छन् ।
सामान्य वर्षा हुँदा पनि पुलको डाइभर्सन भासिने तथा बग्ने समस्याले घण्टौँसम्म सवारी आवागमन अवरुद्ध हुने गरेको छ। महोत्तरी गाउँपालिका–१ पर्सास्थित बिगही खोलामाथि निर्माणाधीन कुटमेश्वरी पुलमा माटो र बालुवाबाट बनाइएको डाइभर्सन सामान्य वर्षामै बग्ने गरेको छ । साथै, पुलसँग जोडिएको माटोको सडकमा ठूला सवारीसाधन सञ्चालन हुँदा सडक भासिने समस्या दोहोरिने भएकाले यात्रुहरूलाई आवतजावतमा ठूलो कठिनाइ भइरहेको स्थानीयवासी बताउँछन् ।
जलेश्वरस्थित प्रादेशिक अस्पतालमा कार्यरत चिकित्सक डा. रोशनकुमार साहले आफू दैनिक जनकपुरबाट निजी सवारीमार्फत ओहोरदोहोर गर्ने गरेको बताउँदै सामान्य वर्षा हुँदा पनि घण्टौँसम्म जाममा बस्नुपर्ने अवस्था रहेको गुनासो गर्नुभयो। सोमबार वर्षापछि सडकमा बस भासिएपछि आफू वैकल्पिक मार्ग प्रयोग गरेर अस्पताल पुग्न बाध्य भएको उहाँले बताउनुभयो । उहाँका अनुसार पुलको डाइभर्सन बन्द भएपछि करिब १० किलोमिटर लामो वैकल्पिक सडक प्रयोग गर्नुपर्ने अवस्था सिर्जना भएको छ ।
भारतीय सीमावर्ती क्षेत्र भिठामोडदेखि जनकपुरसम्म जोड्ने प्रमुख सडकका रूपमा रहेको यस सडकखण्डमा पुल निर्माण समयमै सम्पन्न हुन नसक्दा प्रत्येक वर्षायाममा यातायात सेवा प्रभावित हुँदै आएको छ ।
कुटमेश्वरी पुल निर्माणका लागि २०७९ फागुन २ गते जनकपुरधामस्थित रामजानकी निर्माण सेवाले करिब २० करोड रुपैयाँ लागतमा ठेक्का पाएको थियो। ४० मिटर लम्बाइ र ११ मिटर चौडाइको पुल निर्माण गर्ने सम्झौता भए पनि निर्धारित समयभित्र काम सम्पन्न हुन नसकेपछि पटक–पटक म्याद थप गरिएको छ ।
पहिलो सम्झौता अवधि सकिएपछि निर्माण कम्पनीलाई २०८३ साउन ११ गतेसम्मका लागि पुनः म्याद थप गरिएको थियो । तर दोस्रो पटक थपिएको म्याद सकिन केही दिन मात्र बाँकी रहँदासमेत पुल निर्माणको प्रगति ५० प्रतिशतभन्दा कम रहेको छ ।
स्थानीय युवा पंकज पासवानले गर्मीयाममा धुलो र वर्षायाममा सामान्य वर्षा हुँदा पनि सडक अवरुद्ध हुनु यस पुलको ‘विशेषता’ जस्तै बनेको टिप्पणी गर्नुभयो । उहाँले पिपरा गाउँपालिका, महोत्तरी गाउँपालिका, मटिहानी नगरपालिका र जलेश्वर नगरपालिकाका जनप्रतिनिधिले समन्वय गरेर निर्माण कार्यलाई तीव्रता दिन तथा तत्काल समस्या समाधानका लागि पहल गर्नुपर्ने आवश्यकता औँल्याउनुभयो । उहाँले भन्नुभयो, “वर्षायाम सुरु भइसकेको छ । सामान्य वर्षा हुँदा नै सवारीसाधनलाई वैकल्पिक मार्ग प्रयोग गर्नुपर्ने अवस्था छ ।
धेरै पानी परे यो सडक पूर्ण रूपमा अवरुद्ध हुन्छ । चार वर्ष हुन लाग्दासमेत पुल निर्माण सम्पन्न भएको छैन, डाइभर्सन पनि सामान्य पानीको बहावले बगाइदिन्छ ।”
