रोटरी क्लब अफ वीरगंज मेट्रोपोलिसको प्रायोजनमा इन्टरएक्ट क्लब अफ मिनिल्याण्ड स्कुलको औपचारिक चार्टर (स्थापना) समारोह वीरगंजस्थित त्रिशला होटलमा भव्य रूपमा सम्पन्न भएको छ ।
विद्यालयमा पहिलोपटक स्थापना गरिएको इन्टरएक्ट क्लबले विद्यार्थीहरूमा नेतृत्व क्षमता, सामाजिक उत्तरदायित्व, सेवाभाव तथा व्यक्तित्व विकास अभिवृद्धि गर्ने लक्ष्य राखेको छ । समारोहसँगै क्लबको पहिलो कार्यसमिति पनि घोषणा गरिएको छ । नवगठित कार्यसमितिको अध्यक्षमा अनुकम्पा गुप्ता, सचिवमा श्रुति गुप्ता तथा कोषाध्यक्षमा कृष्ण कर्ण चयन भएका छन् । नवनिर्वाचित पदाधिकारीहरूले सामाजिक सेवामूलक गतिविधि, नेतृत्व विकास तथा विद्यार्थी सहभागितामूलक कार्यक्रमलाई प्राथमिकता दिँदै सक्रिय रूपमा काम गर्ने प्रतिबद्धता व्यक्त गरेका छन् ।
रोटरी क्लब अफ वीरगंज मेट्रोपोलिसका अध्यक्ष रो. सञ्जय जोशीको अध्यक्षतामा सम्पन्न कार्यक्रममा प्रमुख अतिथिका रूपमा लालबाबु पटेल सहभागी हुनुभएको थियो । कार्यक्रममा लायन्स क्लब अफ वीरगंज परिवारका अध्यक्ष लायन नारोत्तम पाण्डेय, प्याब्सन वीरगंजका कोषाध्यक्ष सुरज पटेल, रो. सौरभ बर्नवाल, रो. अनिल जैसवाल, मानवसेवा आश्रम वीरगंजका देवेश गुप्ता, एलाइड युथ सोसाइटीकी चार्टर अध्यक्ष ओमकुमारी झा, नेपालिज यंग इन्टरप्रेनर्स फोरम (एनवाईईएफ) वीरगंज च्याप्टरका अध्यक्ष चन्दन सिंह, अमित शर्मा लगायत विभिन्न सामाजिक, शैक्षिक तथा सेवामूलक संस्थाका प्रतिनिधिहरूको उल्लेखनीय उपस्थिति रहेको थियो ।
कार्यक्रमलाई सम्बोधन गर्दै वक्ताहरूले इन्टरएक्ट क्लब विद्यार्थीहरूमा नेतृत्व विकास, अनुशासन, सामाजिक उत्तरदायित्व तथा स्वयंसेवाको भावना अभिवृद्धि गर्ने प्रभावकारी माध्यम भएको बताए । विद्यालयस्तरमै यस्ता क्लबको स्थापना हुँदा विद्यार्थीहरूमा सामाजिक चेतना, टोलीमा काम गर्ने क्षमता र समुदायप्रतिको दायित्वबोध थप सुदृढ हुने विश्वास उनीहरूले व्यक्त गरे ।
वक्ताहरूले नवगठित क्लबले रोटरीको आदर्श ‘Service Above Self’ (आफ्नोभन्दा सेवालाई प्राथमिकता) लाई आत्मसात् गर्दै शिक्षा, वातावरण संरक्षण, स्वास्थ्य, सामाजिक सेवा तथा मानवीय सहयोगका क्षेत्रमा सक्रिय भूमिका निर्वाह गर्ने अपेक्षा समेत व्यक्त गरेका थिए । कार्यक्रममा विद्यालयका शिक्षक, विद्यार्थी, अभिभावक, रोटरी तथा लायन्स क्लबका सदस्य, प्याब्सनका पदाधिकारी तथा विभिन्न सामाजिक संघ–संस्थाका प्रतिनिधिहरूको उल्लेखनीय सहभागिता रहेको थियो ।
समारोहमा नवगठित कार्यसमितिलाई सफल कार्यकालको शुभकामना दिँदै विद्यार्थीहरूलाई समाजप्रति उत्तरदायी नेतृत्वका रूपमा अघि बढ्न प्रेरित गरिएको थियो ।
