उपभोक्ताले सुरक्षित, स्वच्छ र गुणस्तरीय खाद्य सामग्री उपभोग गर्न पाउने अधिकार सुनिश्चित गर्ने उद्देश्यले बारा जिल्लाका विभिन्न बजार क्षेत्रमा सञ्चालित होटल, क्यान्टिन, रेष्टुरेन्ट तथा मिठाई पसलहरूको संयुक्त अनुगमन गरिएको छ ।
खाद्य प्रविधि तथा गुण नियन्त्रण कार्यालयको अगुवाइमा सम्पन्न अनुगमन निजगढ, कलैया र प्रसौनी क्षेत्रका खाद्य व्यवसायहरूमा केन्द्रित थियो । सम्बन्धित निकायका प्रतिनिधि सम्मिलित टोलीले खाद्य व्यवसाय सञ्चालनको अवस्था, सरसफाइ, खाद्य पदार्थको भण्डारण तथा गुणस्तरको स्थलगत निरीक्षण गरेको हो । खाद्य प्रविधि तथा गुण नियन्त्रण कार्यालयका प्रमुख सुरेश कुमार सिंहका अनुसार व्यवसायीलाई भान्सा तथा पसल परिसर सधैं सफा राख्न, खाद्य सामग्रीलाई धुलो, धुवाँ र किराफट्याङ्ग्राको सम्पर्कबाट सुरक्षित राख्न तथा अखाद्य वा प्रतिबन्धित रङको प्रयोग नगर्न निर्देशन दिइएको छ ।
त्यसैगरी, खाना पकाउन प्रयोग हुने तेलको गुणस्तरमा विशेष ध्यान दिन, एकपटकभन्दा बढी प्रयोग गरिएको तेल पुनः प्रयोग नगर्न तथा म्याद गुज्रिएका खाद्य सामग्री बिक्री नगर्न व्यवसायीलाई सचेत गराइएको उनले बता।अनुगमनका क्रममा खाद्य सामग्री उचित तापक्रममा भण्डारण गर्ने व्यवस्था मिलाउन र उपभोक्तासम्म सुरक्षित तथा गुणस्तरीय खाद्य वस्तु पुर्याउने वातावरण सुनिश्चित गर्न व्यवसायीलाई आग्रह गरिएको । यस क्रममा खाद्य स्वच्छतासम्बन्धी आवश्यक मापदण्ड पूरा नगरेको एक व्यवसायिक प्रतिष्ठानमा कैफियत भेटिएपछि प्रचलित कानुनअनुसार १० हजार रुपैयाँ जरिवाना गरिएको कार्यालयले जनाएको छ ।
कार्यालयले उपभोक्ताको स्वास्थ्यसँग प्रत्यक्ष सरोकार राख्ने विषयमा कुनै पनि प्रकारको लापरवाही स्वीकार्य नहुने स्पष्ट गर्दै आगामी दिनमा पनि यस्ता अनुगमनलाई नियमित रूपमा निरन्तरता दिइने जनाएको छ । साथै, सबै खाद्य व्यवसायीलाई खाद्य स्वच्छता मापदण्डको पूर्ण पालना गर्न तथा उपभोक्तालाई खाद्य सामग्री खरिद गर्दा गुणस्तर, प्याकेजिङ र म्याद सकिने मितिबारे विशेष सचेत रहन आग्रह गरिएको छ ।
