रौतहटको पश्चिमी क्षेत्रमा बग्ने लालबकैया नदीबाट टेन्डरविनै नदीजन्य पदार्थको अवैध उत्खनन तथा ढुवानी भइरहेको भन्दै स्थानीयवासीले नेपाल प्रहरी, सशस्त्र प्रहरी तथा केही जनप्रतिनिधिमाथि मिलेमतोको गम्भीर आरोप लगाएका छन् ।
स्थानीयका अनुसार इलाका प्रहरी कार्यालय विजयपुर–लक्ष्मिनियाअन्तर्गत प्रहरी चौकी हरिनगर जंगलसैयाको कार्यक्षेत्रमा पर्ने गर्जा पुल आसपासबाट बिहीबार पनि ढुंगा, गिटी र बालुवाको अवैध उत्खनन तथा ढुवानी भइरहेको देखिएको छ । उनीहरूले प्रहरी चौकी हरिनगर जंगलसैयाका प्रमुख असई रामेश्वर महतोको मिलेमतोमा अवैध गतिविधि भइरहेको आरोप लगाउँदै निष्पक्ष छानबिन र संलग्नमाथि कारबाहीको माग गरेका छन् । त्यसैगरी इलाका प्रहरी कार्यालय विजयपुर, सशस्त्र प्रहरी बलको बेस क्याम्प विजयपुर तथा अस्थायी बेस क्याम्प पोखरभिन्डाको समेत मिलेमतोमा नदी दोहन भइरहेको स्थानीयको दाबी छ।
नेपाल सरकारको प्रचलित नीतिअनुसार असार महिनादेखि नदीजन्य पदार्थको उत्खनन पूर्ण रूपमा बन्द गरिन्छ। तर गुजरा नगरपालिका र फतुवा विजयपुर नगरपालिकाको क्षेत्रमा भने असार १९ गतेसम्म पनि अवैध उत्खनन तथा ढुवानी नरोकिएको स्थानीयको आरोप छ । स्थानीयका अनुसार गुजरा र फतुवा विजयपुर नगरपालिकाअन्तर्गतका विभिन्न घाटबाट दैनिक सयौं ट्र्याक्टरमार्फत ढुंगा, गिटी र बालुवा उत्खनन गरी ढुवानी भइरहेको छ । दुवै स्थानीय तहले आर्थिक वर्ष २०८२/०८३ का लागि हालसम्म नदीजन्य पदार्थ उत्खननको ठेक्का प्रक्रिया टुंग्याउन नसकेको बताइएको छ ।
टेन्डर प्रक्रिया सम्पन्न नभएको अवस्थामा नदीजन्य पदार्थको उत्खनन पूर्ण रूपमा रोक्नुपर्ने कानुनी व्यवस्था रहे पनि जंगलसहिया, सिमरी, राँगी, बोटावा लगायतका घाटबाट बिहानदेखि साँझसम्म निर्बाध रूपमा उत्खनन र ढुवानी भइरहेको स्थानीयको भनाइ छ ।
समाचार स्रोतका अनुसार नदीबाट सामग्री ढुवानी गर्ने ट्र्याक्टरबाट विभिन्न सुरक्षा निकायलाई मासिक रकम बुझाएर निर्बाध रूपमा ढुवानी गर्ने गरिएको आरोप पनि लगाइएको छ। साथै नदीजन्य पदार्थ ढुवानीमा केही जनप्रतिनिधिको स्वामित्व रहेका ट्र्याक्टरसमेत प्रयोग भइरहेकाले उनीहरू मौन बसेको स्थानीयको दाबी छ । स्थानीयले नदीजन्य पदार्थको अनुगमन तथा नियमन गर्ने जिम्मेवारी पाएको जिल्ला समन्वय समितिले समेत प्रभावकारी भूमिका निर्वाह गर्न नसकेको गुनासो गरेका छन् ।
यता, रौतहटका प्रहरी प्रमुख एसपी सिताराम रिजालले घटनाबारे छानबिन भइरहेको जानकारी दिँदै दोषी देखिएमा कानुनअनुसार तत्काल कारबाही गरिने बताएका छन् ।
