रौतहट । रौतहटको मौलापुर नगरपालिकाकी मेयर रिना साहले प्रमुख प्रशासकीय अधिकृत नपठाएर संघीय सरकारले नगरपालिकाको बजेट कार्यान्वयन प्रभावित पार्न खोजेको आरोप लगाएकी छन् ।
शुक्रबार सञ्चारकर्मीसँग कुरा गर्दै मेयर साहले बजेट कार्यान्वयन र भुक्तानीको महत्त्वपूर्ण समयमा नगरपालिकालाई प्रमुख प्रशासकीय अधिकृतविहीन बनाइएको बताइन् । यसले स्थानीय तहको नियमित कामकाजमा अवरोध सिर्जना गर्नुका साथै बजेट ‘फ्रिज’ गराउने नियत देखिएको उनको दाबी छ ।
उनका अनुसार संघीय मामिला तथा सामान्य प्रशासन मन्त्रालयले यसअघि प्रमुख प्रशासकीय अधिकृतका रूपमा सुरेशबाबु घिमिरेलाई मौलापुर नगरपालिकामा खटाएको थियो । तर उनले आफ्नो जिम्मेवारी प्रभावकारी रूपमा निर्वाह नगरेपछि मन्त्रालयले उनलाई फिर्ता बोलाएको भए पनि हालसम्म नयाँ प्रमुख प्रशासकीय अधिकृत नपठाइएको मेयर साहले बताइन् ।
मेयर साहले नगरपालिकाले सञ्चालन गर्दै आएका ‘फ्रि बिजुली’, ‘फ्रि पानी’ तथा ‘छोरीसँग मेयर’ (विवाहमा आर्थिक सहयोग) जस्ता जनमुखी कार्यक्रमलाई समेत प्रभावित पार्ने उद्देश्यले संघीय सरकारले अनावश्यक हस्तक्षेप गरिरहेको आरोप लगाइन् ।
उनले प्रमुख प्रशासकीय अधिकृतको अभावका कारण कृषक अनुदान वितरण, बहुपोषण कार्यक्रम, शिक्षा, स्वास्थ्य, सरसफाइ तथा विभिन्न विकास निर्माणका योजनाको कार्यान्वयनमा समेत प्रत्यक्ष असर परेको बताइन् ।
मेयर साहले स्थानीय सरकारलाई प्रभावकारी रूपमा सञ्चालन गर्न आवश्यक जनशक्ति समयमै उपलब्ध गराउन संघीय सरकारसँग माग गर्दै जनतामुखी कार्यक्रमलाई अवरुद्ध हुन नदिन तत्काल प्रमुख प्रशासकीय अधिकृत खटाउन आग्रह गरेकी छन् ।
