स्थानीयको अवरोधपछि रोकिएको वीरगंजको मुख्य सडक क्षेत्रमा सडक सीमाभित्र परेका घर तथा संरचना हटाउने अभियान अझै अघि बढ्न सकेको छैन । विवाद समाधानका लागि शनिबार सरोकारवाला निकायबीच सर्वपक्षीय बैठक बस्ने भएको छ ।
सडक डिभिजन कार्यालय हेटौँडाले शुक्रबार दिउँसोदेखि त्रिभुवन राजमार्गअन्तर्गत वीरगञ्जको मुख्य सडक क्षेत्रमा सडक सीमा अतिक्रमण गरी निर्माण गरिएका स्थायी तथा अस्थायी संरचना हटाउने अभियान सुरु गरेको थियो । कृषि औजार कारखानासम्मका संरचना हटाइसकेपछि साँझ करिब ५ बजेतिर बहुअरी क्षेत्रका स्थानीयले डोजर सञ्चालनमा अवरोध गरेपछि अभियान रोकिएको हो ।
स्थानीयले वीरगंज महानगरपालिकासँग आवश्यक समन्वय नगरी सडक विस्तारको काम अघि बढाइएको भन्दै असन्तुष्टि जनाएका छन् । सरोकारवाला निकायबीच छलफल जारी रहेकाले सहमति नभएसम्म डोजर सञ्चालन गर्न नदिने उनीहरूको अडान रहेको छ ।
सडक डिभिजन कार्यालय हेटौँडाका इन्जिनियर तथा वीरगञ्जका लागि तोकिएका फोकल पर्सन दुर्गा प्रसादका अनुसार उत्पन्न विवाद समाधानका लागि शनिबार प्रमुख जिल्ला अधिकारी, नेपाल प्रहरी, सशस्त्र प्रहरी, सडक डिभिजन कार्यालयका प्राविधिक तथा सम्बन्धित पक्षको सहभागितामा बैठक आयोजना गरिएको छ । उनले केन्द्र सरकारबाट सडक विस्तारको काम अघि बढाउन निर्देशन प्राप्त भए पनि स्थानीयस्तरमा विवाद सिर्जना नगरी सहमतिका आधारमा अभियान सञ्चालन गर्न खोजिएको बताए। बैठकबाट सहमति जुट्ने अपेक्षा गरिएको उनको भनाइ छ ।
सडक डिभिजन कार्यालयले वीरगंज महानगरपालिकालाई गत असार ५ गते पत्राचार गर्दै त्रिभुवन राजमार्गअन्तर्गत सिरसिया–मितेरी पुलदेखि बहुअरी गण्डक चोकसम्म सडकको केन्द्ररेखाबाट दायाँ–बायाँ २५–२५ मिटरभित्र रहेका स्थायी तथा अस्थायी संरचना हटाउन सहयोग गर्न अनुरोध गरेको थियो । तर महानगरबाट आवश्यक समन्वय हुन नसक्दा अभियान अघि बढ्न सकेको थिएन ।
यसअघि पनि सडक विभागले सार्वजनिक सूचना जारी गर्दै सडक सीमाभित्र रहेका संरचना स्वयं हटाउन अन्तिम समयसीमा दिएको थियो । गत वैशाख ६ र ७ गते पहिलो चरणमा मुख्य सडक क्षेत्रका करिब १ हजार २ सय घर तथा भवनमा डोजर चलाइएको थियो । त्यसक्रममा अधिकांश संरचनाको अगाडिको भाग हटाइएको थियो भने बाँकी संरचना २५ दिनभित्र आफैँ हटाउन सम्बन्धित पक्षलाई आग्रह गरिएको थियो ।
तोकिएको समयसीमा समाप्त हुँदासमेत धेरै संरचना यथावत् रहेपछि सडक विभागले दोस्रो चरणको अतिक्रमण हटाउने अभियान सुरु गरेको हो ।
