प्रधानमन्त्री बालेन्द्र शाह नेतृत्वको सरकार गठन भएको शनिबार १०० दिन पूरा भएको छ । यस अवधिमा मधेश प्रदेशमा सुशासन, सार्वजनिक सेवा प्रवाह र शान्ति–सुरक्षाका क्षेत्रमा उल्लेखनीय सुधार भएको दाबी गरिएको छ ।
सरकारी तथा स्थानीय स्रोतका अनुसार कार्यालयबाट प्रदान गरिने सेवामा सुधार आएको, सीमाक्षेत्रमा हुने भन्सार चोरी–तस्करी नियन्त्रणमा आएको, सार्वजनिक जग्गा अतिक्रमण हटाइएको तथा बिचौलियामुक्त सेवा प्रणाली विस्तार भएको जनाइएको छ । मधेश प्रदेशका आठै जिल्लाका जिल्ला प्रशासन कार्यालयले हुलाक कार्यालयसँगको सहकार्यमा राहदानी घरदैलोमै पुर्याउने सेवा सुरु गरेपछि राहदानीका लागि लामो समय कुर्नुपर्ने बाध्यता अन्त्य भएको बताइएको छ । यसअघि बिचौलियाका कारण हुने आर्थिक चलखेल र झन्झटमा कमी आएको सेवाग्राहीहरूको भनाइ छ ।
नागरिकहरूले कार्यालयमा कर्मचारीको व्यवहारमा सुधार आएको र सेवाग्राहीप्रति उत्तरदायी बनेको अनुभव व्यक्त गरेका छन् । सरकारले सञ्चालन गरेको ‘हेलो सरकार’ कार्यक्रममार्फत जनताले आफ्ना गुनासा सहज रूपमा राख्न थालेको जनाइएको छ ।
विपद् व्यवस्थापनका क्षेत्रमा पनि पूर्वतयारी अभ्यासहरू गरिएको र बाढीपहिरो जोखिम न्यूनीकरणमा सरकारी संयन्त्र सक्रिय रहेको बताइएको छ । यसले विपद्को अवस्थामा सरकार साथमा रहेको अनुभूति नागरिकमा बढेको उल्लेख गरिएको छ । विकास निर्माणतर्फ पूर्व–पश्चिम राजमार्गअन्तर्गत धनुषा, महोत्तरी र सर्लाही क्षेत्रमा कामले तीव्रता पाएको छ । साथै, समयमै काम सम्पन्न नगर्ने एक दर्जनभन्दा बढी ठेकेदारका ठेक्का सम्झौता रद्द गरिएको जनाइएको छ ।
धनुषाका प्रमुख जिल्ला अधिकारी प्रेमप्रसाद लुइटेलका अनुसार शान्ति–सुरक्षामा सुधार आएको छ । सीमाक्षेत्रमा भन्सार चोरी–तस्करी नियन्त्रणमा आएको र सशस्त्र प्रहरीले अवैध सामग्री नियन्त्रणमा उल्लेखनीय सफलता हासिल गरेको उनले बताए । उद्योग वाणिज्य संघ जनकपुरधामका पूर्वअध्यक्ष जितेन्द्र महासेठले वर्तमान सरकार आएपछि सरकारी कार्यालयको सेवा प्रवाहमा सुधार आएको र बिचौलियाको प्रभाव घटेको बताएका छन् ।
नेपाल पत्रकार महासंघका केन्द्रीय पार्षद अजय झाले सरकारप्रति जनतामा आशा बढेको बताए पनि सरकारी तथा सामुदायिक विद्यालयको पठनपाठनमा अझै सुधार आवश्यक रहेको उल्लेख गरेका छन् ।
