बाराको जीतपुरसिमरा उपमहानगरपालिका–२ स्थित श्री नेपाल राष्ट्रिय नमुना माध्यमिक विद्यालयले प्रविधिमैत्री शिक्षालाई थप प्रभावकारी बनाउने उद्देश्यका साथ ७ वटा नयाँ स्मार्ट बोर्ड प्राप्त गरेको छ । बहुराष्ट्रिय कम्पनी सूर्य नेपाल प्रालिले आफ्नो संस्थागत सामाजिक उत्तरदायित्व (सीएसआर) कार्यक्रमअन्तर्गत विद्यालयलाई उक्त सामग्री उपलब्ध गराएको हो ।
आयोजित हस्तान्तरण कार्यक्रममा सूर्य नेपालका व्यवस्थापक सुरेशकाजी श्रेष्ठले विद्यालयका प्रधानाध्यापक शंकर आचार्यलाई स्मार्ट बोर्ड हस्तान्तरण गर्दै गुणस्तरीय शिक्षाका लागि आधुनिक प्रविधिको प्रयोग अपरिहार्य बन्दै गएको बताए । उनले सूचना प्रविधिको तीव्र विकाससँगै विद्यालयको शिक्षण–सिकाइ प्रणालीलाई डिजिटल माध्यममा रूपान्तरण गर्न आवश्यक रहेको उल्लेख गर्दै अहिलेको प्रतिस्पर्धात्मक युगमा कम्प्युटर तथा डिजिटल सीप विद्यार्थी र शिक्षक दुवैका लागि आधारभूत आवश्यकता बनिसकेको बताए ।
श्रेष्ठले कृत्रिम बौद्धिकता (एआई), च्याटजीपीटी, जेमिनी तथा क्लाउड प्रविधिजस्ता आधुनिक डिजिटल उपकरणले विश्वभर शिक्षा र कार्यशैलीमा परिवर्तन ल्याइरहेको उल्लेख गर्दै समयअनुसार आफूलाई अद्यावधिक गर्नुपर्ने आवश्यकता औँल्याए । उनका अनुसार ४३ वर्षदेखि नेपालमा सञ्चालनमा रहेको सूर्य नेपालले शिक्षा, स्वास्थ्य, वातावरण संरक्षण तथा सामुदायिक विकासका क्षेत्रमा निरन्तर सामाजिक लगानी गर्दै आएको छ । स्थानीय समुदायसँग सहकार्य गरी दीर्घकालीन विकासमा योगदान पुर्याउने कम्पनीको नीति रहेको उनले बताए ।
विद्यालयमा यसअघि पनि सूर्य नेपालले प्रशासनिक भवन निर्माण, जीवविज्ञान प्रयोगशाला स्थापना, कम्प्युटर उपलब्ध गराउने, स्मार्ट बोर्ड वितरणलगायत विभिन्न शैक्षिक पूर्वाधार विकासमा सहयोग गर्दै आएको छ । हाल विद्यालय परिसरमा इन्टरलक ब्लक बिछ्याउने तथा हरियाली प्रवर्द्धन गर्ने कार्यसमेत सञ्चालन भइरहेको जानकारी दिइएको छ ।
प्रधानाध्यापक शंकर आचार्यले सूर्य नेपालको निरन्तर सहयोगप्रति आभार व्यक्त गर्दै स्मार्ट बोर्डको प्रयोगले कक्षाकोठाको शिक्षण–सिकाइलाई थप प्रभावकारी, अन्तरक्रियात्मक र विद्यार्थीमैत्री बनाउने विश्वास व्यक्त गरे । अडियो, भिडियो, प्रस्तुतीकरण तथा अन्य डिजिटल सामग्रीको प्रयोगमार्फत विद्यार्थीको सिकाइ उपलब्धिमा सकारात्मक सुधार आउने अपेक्षा उनले व्यक्त गरे ।
यसै कार्यक्रममार्फत सूर्य नेपालले क्षेत्रका अन्य शैक्षिक संस्थालाई पनि स्मार्ट बोर्ड वितरण गरेको जनाएको छ । कम्पनीका अनुसार सिमरा कलेजलाई ४ वटा तथा जनता माध्यमिक विद्यालय, रजघट्टा माध्यमिक विद्यालय, डुमरवाना माध्यमिक विद्यालय र पथलैया माध्यमिक विद्यालयलाई जनही २/२ वटा स्मार्ट बोर्ड उपलब्ध गराइएको छ ।
कम्पनीले शिक्षामा प्रविधिको पहुँच विस्तार गर्दै सामुदायिक विद्यालयको शैक्षिक गुणस्तर अभिवृद्धि गर्ने उद्देश्यले यस्ता कार्यक्रमलाई निरन्तरता दिँदै आएको जनाएको छ । यस सहयोगबाट जीतपुरसिमरा उपमहानगरपालिकाभित्रका विद्यालयहरूमा डिजिटल शिक्षाको विस्तारमा सकारात्मक प्रभाव पर्ने अपेक्षा गरिएको छ ।
कार्यक्रममा वडा नं. २ का अध्यक्ष धनबहादुर श्रेष्ठ, सूर्य नेपालका प्रतिनिधि यज्ञबहादुर आले, उमेश थापा तथा विद्यालयका शिक्षक, अभिभावक र अन्य सरोकारवालाको उपस्थिति रहेको थियो ।
