पर्साको जगरनाथपुर गाउँपालिका–३, जमुनियामा निर्माण सम्पन्न भव्य प्रवेशद्वारको उद्घाटन गरिएको छ । गाउँपालिकाको पहिचान, सौन्दर्य तथा पूर्वाधार विकासलाई थप सुदृढ बनाउने उद्देश्यले निर्माण गरिएको प्रवेशद्वारको उद्घाटन पूर्व उद्योग, वाणिज्य तथा आपूर्ति मन्त्री रमेश रिजालले गरेका हुन् ।
उद्घाटन कार्यक्रममा जगरनाथपुर गाउँपालिकाका अध्यक्ष श्रीकान्त प्रसाद यादव, जनप्रतिनिधि, कर्मचारी, विभिन्न राजनीतिक दलका प्रतिनिधि, समाजसेवी, बुद्धिजीवी, सञ्चारकर्मी तथा स्थानीयवासीको उल्लेखनीय सहभागिता रहेको थियो ।
कार्यक्रमलाई सम्बोधन गर्दै पूर्वमन्त्री रिजालले गुणस्तरीय पूर्वाधार विकास नै स्थानीय तहको समृद्धिको मुख्य आधार भएको बताए । उनले प्रवेशद्वारजस्ता संरचनाले गाउँपालिकाको पहिचान स्थापित गर्नुका साथै विकासप्रतिको प्रतिबद्धता पनि झल्काउने उल्लेख गरे ।
उनले स्थानीय सरकार नागरिकसँग सबैभन्दा नजिकको सरकार भएकाले जनताको आवश्यकतालाई केन्द्रमा राखेर सञ्चालन गरिएका विकास योजनाले मात्र दीर्घकालीन उपलब्धि दिने धारणा राखे । जगरनाथपुर गाउँपालिकाले पूर्वाधार विकासमा चालेका कदम प्रशंसनीय रहेको उल्लेख गर्दै यस्ता योजनाले स्थानीय पर्यटन, आर्थिक गतिविधि तथा गाउँपालिकाको समग्र पहिचानलाई थप सुदृढ बनाउने विश्वास व्यक्त गरे ।
गाउँपालिका अध्यक्ष श्रीकान्त प्रसाद यादवले नवनिर्मित प्रवेशद्वार जमुनियाको मात्र नभई समग्र जगरनाथपुर गाउँपालिकाको गौरव, पहिचान र समृद्धिको प्रतीकका रूपमा स्थापित हुने विश्वास व्यक्त गरे । उनले गाउँपालिकामा सडक, शिक्षा, स्वास्थ्य, कृषि, खानेपानी तथा अन्य पूर्वाधारका क्षेत्रमा योजनाबद्ध रूपमा विकास निर्माणका काम अघि बढिरहेको जानकारी दिए ।
अध्यक्ष यादवले नागरिकको अपेक्षाअनुसारका योजनालाई उच्च प्राथमिकताका साथ कार्यान्वयन गरिने बताउँदै विकास, सुशासन र समृद्धिको यात्रामा गाउँपालिका निरन्तर अगाडि बढिरहेको उल्लेख गरे । आगामी दिनमा पनि जनसहभागितामूलक तथा दिगो विकासका योजनालाई निरन्तरता दिइने प्रतिबद्धता उनले व्यक्त गरे ।
उनले प्रवेशद्वार निर्माण कार्य सम्पन्न गर्न सहयोग पुर्याउने जनप्रतिनिधि, कर्मचारी, निर्माण व्यवसायी तथा स्थानीयवासीप्रति आभार व्यक्त गरे ।
स्थानीयवासीले पनि प्रवेशद्वार निर्माणसँगै गाउँपालिकाको सौन्दर्य, पहिचान र गरिमामा वृद्धि भएको प्रतिक्रिया दिएका छन्। गाउँपालिकाले आगामी दिनमा पनि विकास, सुशासन र समृद्धिलाई केन्द्रमा राखेर नागरिकमुखी योजनालाई प्राथमिकताका साथ अघि बढाउने जनाएको छ ।
