जनकपुरधाम । जनकपुरधाम उपमहानगरपालिकाले छाडा पशुचौपाया व्यवस्थापनमा कडाइ गर्दै हालसम्म पाँच सयभन्दा बढी छाडा पशु नियन्त्रणमा लिएको छ ।
छाडा पशुका कारण बढ्दो मानवीय जोखिम न्यूनीकरण गर्ने उद्देश्यले सञ्चालन गरिएको अभियानअन्तर्गत पशु छाड्ने व्यक्तिबाट हालसम्म ७ लाख रुपैयाँभन्दा बढी जरिवाना असुल गरिएको उपमहानगरपालिकाले जनाएको छ ।
आइतबार कृषि तथा पशुपन्छी विकास शाखाले आयोजना गरेको ‘छाडा पशु व्यवस्थापन तथा प्लास्टिकजन्य फोहोर नियन्त्रण’ सम्बन्धी छलफल तथा अन्तरक्रिया कार्यक्रममा जनकपुरधाम उपमहानगरपालिकाका प्रमुख मनोजकुमार साहले छाडा पशुचौपायाको समस्या पछिल्लो समय चुनौतीपूर्ण बन्दै गएको बताए ।
उनले उपमहानगरपालिकाले सडकमा पशु छाड्ने व्यक्तिलाई ५ हजार रुपैयाँसम्म जरिवाना गर्ने व्यवस्था प्रभावकारी रूपमा लागू गरेको जानकारी दिए । उनका अनुसार नियन्त्रणमा लिइएका पाँच सयभन्दा बढी पशुचौपायालाई वडा नं. १२ स्थित गौशालामा राखिएको छ ।
प्रमुख साहले नियमको कार्यान्वयनसँगै जनचेतना अभिवृद्धि पनि उत्तिकै आवश्यक रहेको उल्लेख गर्दै छाडा पशु व्यवस्थापन स्थानीय तहको मात्र जिम्मेवारी नभई संघ, प्रदेश र स्थानीय सरकार, निजी क्षेत्र, नागरिक समाज तथा सर्वसाधारणको साझा दायित्व भएको बताए ।
कार्यक्रममा मधेश प्रदेश सरकारको भूमि व्यवस्था, कृषि तथा सहकारी मन्त्रालयका सचिव डा. सञ्जयकुमार यादवले छाडा पशु व्यवस्थापनलाई सार्वजनिक स्वास्थ्य, वातावरण संरक्षण तथा पशु कल्याणसँग जोडिएको साझा जिम्मेवारीका रूपमा लिनुपर्ने धारणा राखे । उनले प्लास्टिकजन्य फोहोरको अव्यवस्थित व्यवस्थापनका कारण पशुको स्वास्थ्यमा गम्भीर असर परिरहेको उल्लेख गर्दै प्लास्टिकको प्रयोग न्यूनीकरण र प्रभावकारी फोहोर व्यवस्थापनमा जोड दिए ।
भेटेरिनरी अस्पताल तथा पशु सेवा केन्द्र धनुषाका प्रमुख डा. सञ्जीवकुमार ठाकुरले प्लास्टिकजन्य फोहोरका कारण सडकमा छाडिएका गाईवस्तु तथा अन्य पशु सबैभन्दा बढी प्रभावित भइरहेको बताए । उनका अनुसार प्लास्टिकसहितका फोहोर खाँदा पशुको पेटमा प्लास्टिक जम्मा हुने, पाचन प्रणालीमा समस्या आउने, उत्पादन क्षमता घट्ने र कतिपय अवस्थामा मृत्यु हुनेसम्मका घटना हुने गरेका छन् ।
कार्यक्रममा सहभागीहरूले छाडा पशु व्यवस्थापन, प्लास्टिकजन्य फोहोर नियन्त्रण, पशु कल्याण तथा सुरक्षित सहरी वातावरण निर्माणका लागि सबै सरोकारवाला निकायबीच समन्वय, सहकार्य र जनसहभागिता बढाउनुपर्नेमा जोड दिएका थिए ।
