बारा | पर्याप्त वर्षा नहुँदा बारा जिल्लामा यस वर्ष धान रोपाइँ अपेक्षाकृत सुस्त बनेको छ । असार २२ गतेसम्म जिल्लाको कुल धान खेतीयोग्य क्षेत्रफलमध्ये करिब १३ प्रतिशत अर्थात् ५ हजार ८६३ हेक्टर जमिनमा मात्रै धान रोपाइँ सम्पन्न भएको छ ।
कृषि ज्ञान केन्द्र बाराका सूचना अधिकारी गणेश महराका अनुसार जिल्लामा यस वर्ष करिब ४५ हजार १०० हेक्टर क्षेत्रफलमा धान खेती हुने अनुमान गरिएको भए पनि पर्याप्त वर्षा नहुँदा हालसम्म सीमित क्षेत्रमै रोपाइँ हुन सकेको हो ।
उनका अनुसार गत वर्ष यही अवधिसम्म जिल्लाको करिब १९ प्रतिशत क्षेत्रफलमा धान रोपाइँ सम्पन्न भइसकेको थियो । यस वर्ष मनसुन ढिलो सक्रिय हुनुका साथै पर्याप्त वर्षा नभएकाले गत वर्षको तुलनामा रोपाइँको प्रगति करिब ६ प्रतिशतले घटेको छ ।
समयमै पर्याप्त पानी नपर्दा खेत तयारीदेखि बिरुवा रोप्ने कार्यसम्म किसानले विभिन्न समस्या भोग्नुपरेको सूचना अधिकारी महराले बताए । पानीको अभावका कारण धेरै किसान अझै पनि रोपाइँ सुरु गर्न नसकेको अवस्था रहेको उनले जानकारी दिए।
यद्यपि जिल्लाका विभिन्न स्थानीय तहमा धान रोपाइँ जारी रहेकाले आगामी दिनमा मनसुन सक्रिय भई पर्याप्त वर्षा भए रोपाइँले तीव्र गति लिने अपेक्षा कृषि ज्ञान केन्द्रले गरेको छ ।
गत आर्थिक वर्ष बारामा ४६ हजार २० हेक्टर क्षेत्रफलमा धान खेती गर्ने लक्ष्य निर्धारण गरिएको थियो । त्यसमध्ये ४५ हजार ९९ हेक्टर क्षेत्रफलमा धान रोपाइँ सम्पन्न भएको थियो, जुन कुल लक्ष्यको करिब ९८ प्रतिशत रहेको कृषि ज्ञान केन्द्र बाराको तथ्यांकले देखाएको छ ।
