वीरगंज महानगरपालिकाले वितरण गर्दै आएको लोककल्याणकारी सूचना अब साप्ताहिक पत्रपत्रिकाले पनि पाउने भएका छन् ।
आमसञ्चार माध्यम प्रवर्द्धन तथा नियमन समितिले यसअघिको निर्णय सच्याउँदै साप्ताहिक पत्रपत्रिकालाई समेत समेटेर सूचीकरणका लागि आह्वान गर्ने निर्णय गरेको हो । यसअघि महानगरले साप्ताहिक पत्रपत्रिकालाई सूचीकरण नगर्ने निर्णय गरेपछि ती सञ्चारमाध्यमहरू लोककल्याणकारी सूचनाबाट वञ्चित हुँदै आएका थिए । साप्ताहिक पत्रपत्रिकालाई सूचनाको पहुँचबाट टाढा राख्नु महानगरले आफैंले निर्माण गरेको आमसञ्चारसम्बन्धी कानुनको मर्म र व्यवस्थाविपरीत रहेको भन्दै नेपाल पत्रकार महासंघले उक्त निर्णय सच्याउन निरन्तर दबाब दिँदै आएको थियो ।
आमसञ्चार माध्यम प्रवर्द्धन तथा नियमन समितिका संयोजक शत्रुधन नेपालको अध्यक्षतामा बसेको बैठकले यसअघि लोककल्याणकारी सूचनाबाट वञ्चित साप्ताहिक पत्रपत्रिकालाई समेटेर सूचीकरण प्रक्रिया अघि बढाउने निर्णय गरेको हो । समितिका पदेन सदस्यसमेत रहेका नेपाल पत्रकार महासंघ पर्साका अध्यक्ष ओमप्रकाश खनालले सामाजिक सञ्जालमार्फत यस निर्णयलाई समान अवसर, संस्थागत न्याय र स्वतन्त्र पत्रकारिताको सम्मानका दृष्टिले महत्वपूर्ण उपलब्धि भएको बताएका छन् ।
उनले विगत तीन वर्षदेखि साप्ताहिक पत्रपत्रिकालाई लोककल्याणकारी सूचनाको वितरणबाट वञ्चित गरिँदै आएको अवस्थाप्रति नेपाल पत्रकार महासंघले निरन्तर र जिम्मेवार ढंगले आवाज उठाउँदै आएको उल्लेख गरेका छन् । महासंघको निरन्तर पहल र दबाबपछि आमसञ्चार माध्यम प्रवर्द्धन तथा नियमन समितिले विभेदपूर्ण व्यवस्था सच्याउँदै यही आर्थिक वर्षदेखि नै साप्ताहिक पत्रपत्रिकालाई सूचीकरण गर्ने निर्णय गरेको उनको भनाइ छ । बैठकले महानगरको प्रक्रियागत ढिलासुस्तीका कारण चालु आर्थिक वर्षमा उपलब्ध हुन नसकेको लोककल्याणकारी सूचनावापतको रकम आगामी आर्थिक वर्षमा पूर्ति हुने गरी उपलब्ध गराउने निर्णयसमेत गरेको छ ।
अध्यक्ष खनालले उक्त निर्णयका लागि सकारात्मक भूमिका निर्वाह गर्ने वीरगंज महानगरपालिकाको नेतृत्व, आमसञ्चार माध्यम प्रवर्द्धन तथा नियमन समितिका पदाधिकारी तथा यस अभियानमा सहयोग गर्ने सञ्चारकर्मीहरूलाई धन्यवाद व्यक्त गरेका छन् । उनले निष्पक्ष, समावेशी र उत्तरदायी सञ्चार वातावरण निर्माणका लागि महासंघको प्रतिबद्धता आगामी दिनमा पनि निरन्तर रहने बताएका छन् ।
वीरगंज महानगरपालिकाका कार्यवाहक प्रमुख इम्तियाज आलमले स्थानीय सञ्चारमाध्यमको प्रवर्द्धन र सुदृढीकरणमा महानगर सधैं सकारात्मक रहेको बताएका छन्। उनका अनुसार सञ्चारमाध्यम सशक्त भए लोकतन्त्र, पारदर्शिता र सुशासन थप बलियो हुने भएकाले स्थानीय सञ्चार क्षेत्रको विकास र संरक्षणमा महानगर प्रतिबद्ध रहेको छ ।
उनले वीरगंज महानगरपालिका सञ्चारमाध्यम प्रवर्द्धनसम्बन्धी कानुन निर्माण गर्ने पहिलो स्थानीय तह भएको उल्लेख गर्दै कानुनमा भएको व्यवस्थाअनुसार सञ्चारमाध्यमलाई सबलीकरण गर्ने कार्यमा महानगरले रचनात्मक भूमिका निर्वाह गर्दै आएको बताए ।
