धनुषाका अधिकांश स्थानीय तहमा आर्थिक तथा वित्तीय कारोबार सञ्चालनका लागि प्रयोग हुँदै आएको सुत्र प्रणाली आर्थिक वर्षको अन्तिम दिन सुस्त गतिमा सञ्चालन हुँदा विभिन्न समस्या उत्पन्न भएका छन् ।
प्रणालीमा आएको अवरोधका कारण विकास निर्माणका योजनाको भुक्तानी, कर्मचारीको तलब–भत्ता तथा अन्य अनिवार्य वित्तीय दायित्वहरू समयमै भुक्तानी हुन नसक्ने अवस्था सिर्जना भएको सरोकारवाला कर्मचारीहरूले बताएका छन् । जनकपुरधाम उपमहानगरपालिकामा बिहीबार बिहान करिब १० बजेदेखि साढे १२ बजेसम्म सुत्र प्रणालीको सर्भर डाउन भएपछि सेवाग्राही र कर्मचारीबीच अन्योलको अवस्था सिर्जना भएको थियो ।
एक निर्माण व्यवसायीका अनुसार कर्मचारीहरूले तलब–भत्ता तथा अन्य कार्यक्रमको भुक्तानी ढिलोचाँडो गरेर पनि निकाल्न सक्ने अवस्था भए पनि निर्माण व्यवसायीहरूको भुक्तानी भने विभिन्न कारण देखाउँदै रोकिएको छ । उनका अनुसार प्रमुख प्रशासकीय अधिकृतले आवश्यक कागजात तथा प्रक्रियाको बहाना बनाएर कतिपय फाइलहरू सदर नगरेको र सदर भएका फाइलहरू पनि सर्भर समस्याका कारण लेखा शाखामै रोकिएका थिए ।
यो समस्या जनकपुरधाम उपमहानगरपालिकामा मात्र सीमित नभई जिल्लाका अधिकांश स्थानीय तहमा देखिएको बताइएको छ । कतै कर्मचारीको चाप त कतै सर्भर डाउनको समस्याका कारण दैनिक वित्तीय कारोबार नै प्रभावित बनेको छ । निर्माण सम्पन्न भएका योजनाको भुक्तानी रोकिँदा निर्माण व्यवसायीहरू समस्यामा परेका छन् भने सेवा प्रदायकहरूले पनि समयमै रकम प्राप्त गर्न नसक्दा असन्तुष्टि व्यक्त गरेका छन् ।
स्थानीय तहका अधिकारीहरूका अनुसार भुक्तानी प्रक्रिया अवरुद्ध हुँदा विकास आयोजनाको कार्यान्वयनमा समेत असर परेको छ । कतिपय योजनाको काम सम्पन्न भए पनि रकम निकासा हुन नसक्दा निर्माण व्यवसायीले कामको गति सुस्त बनाएका छन् । यस्तै कर्मचारीको तलब–भत्ता, विभिन्न सेवा तथा कार्यक्रमसँग सम्बन्धित नियमित भुक्तानीमा समेत ढिलाइ हुने अवस्था सिर्जना भएको छ, जसले स्थानीय सरकारको सेवा प्रवाहमा प्रत्यक्ष प्रभाव पारेको कर्मचारीहरूको भनाइ छ ।
सुत्र प्रणाली नियमित रूपमा सञ्चालन हुन नसक्दा सेवाग्राही, निर्माण व्यवसायी तथा अन्य सरोकारवालाबाट गुनासो बढ्दै गएको छ । वित्तीय कारोबार प्रभावित हुँदा स्थानीय तहका कर्मचारीहरू समेत अतिरिक्त दबाबमा काम गर्न बाध्य भएको उनीहरूले बताएका छन् । स्थानीय तहहरूले कानुनले तोकेको समयसीमाभित्र भुक्तानी प्रक्रिया सम्पन्न गर्न सकिने वातावरण निर्माणका लागि महालेखा नियन्त्रकको कार्यालयसँग सुत्र प्रणाली यथाशीघ्र नियमित सञ्चालनमा ल्याउन आग्रह गरेका छन् ।
स्थानीय तहका जनप्रतिनिधि तथा कर्मचारीहरूले समस्या तत्काल समाधान नभए विकास निर्माण, सेवा प्रवाह तथा वित्तीय व्यवस्थापनमा थप जटिलता उत्पन्न हुने चेतावनी दिएका छन् ।
