सिरहा | सिरहाको लहानसहित विभिन्न बजार क्षेत्रमा खाना पकाउने एलपी ग्यासको अभाव भएपछि सर्वसाधारण उपभोक्ता समस्यामा परेका छन् । विशेषगरी कोशी ग्यास पर्याप्त मात्रामा आपूर्ति नहुँदा उपभोक्ताले सहज रूपमा ग्यास पाउन नसकेको गुनासो गरेका छन् ।
लहान–२ का अरविन्द यादवका अनुसार आधा सिलिन्डरमा उपलब्ध हुने कोशी ग्यास सकिएपछि लहानका चारवटै डिलरमा धाउँदा पनि ग्यास पाउन सकिएको छैन । “ग्यास आएको भोलिपल्ट डिलरमा पुग्दा पनि ग्यास सकिइसकेको हुन्छ। ग्यास कहिले आउँछ भन्ने निश्चित हुँदैन। साइकल र मोटरसाइकलमा सिलिन्डर बोकेर सबै डिलरमा पुग्दा पनि रित्तै फर्किनुपर्ने अवस्था छ,” उनले बताए ।
उपभोक्ताका अनुसार पछिल्ला केही महिनादेखि ग्यास अभावको समस्या निरन्तर दोहोरिँदै आएको छ । लहान, सिरहा र गोलबजारका सहरी क्षेत्रमा समेत कोशी ग्यास प्रयोग गर्ने उपभोक्ताले सहज रूपमा ग्यास नपाएको गुनासो गरेका छन् ।
लहान–१ का नागरिक अगुवा दिनेश यादवले ग्यास आपूर्तिको समस्या समाधानका लागि सम्बन्धित डिलरसँग पटक–पटक जिज्ञासा राख्दा पनि सन्तोषजनक जवाफ नपाएको बताए । उनका अनुसार एक हजार ५० रुपैयाँमा बिक्री हुनुपर्ने ग्यास सिलिन्डर कृत्रिम अभाव सिर्जना गरी कतिपय स्थानमा अतिरिक्त रकम लिएर बिक्री भइरहेको छ ।
“ग्यासबिना खाना पकाउन नसकिने भएकाले उपभोक्ता बाध्य भएर बढी मूल्य तिरेर पनि किन्नुपर्ने अवस्था छ,” उनले भने । उनले अनुगमनकारी निकाय प्रभावकारी रूपमा सक्रिय नहुँदा कालोबजारी बढ्दै गएको आरोपसमेत लगाए ।
यता लहान–३ का ग्यास डिलर श्रवण महतोले भने विराटनगरबाट मागअनुसार ग्यास आपूर्ति हुन नसक्दा समस्या उत्पन्न भएको बताए । उनका अनुसार लहानका चारवटै डिलरमा आवश्यकताभन्दा कम मात्रामा ग्यास आउने गरेको छ।
“ग्यास आएको दिन ठूलो संख्यामा उपभोक्ता आउने गर्छन् । होटल व्यवसायी र घरेलु उपभोक्तालाई छुट्याउनसमेत कठिन हुन्छ । कतिपय उपभोक्ताले चार–चार वटा सिलिन्डर सुरक्षित राख्ने गरेका कारण भोलिपल्टसम्म ग्यास सकिइसकेको हुन्छ,” उनले बताए ।
जिल्ला उद्योग वाणिज्य संघ लहान–सिरहाका अध्यक्ष प्रदीप गुप्ताले उपभोक्ताबाट लगातार गुनासो आएपछि समस्या समाधानका लागि सम्बन्धित निकायसँग पटक–पटक छलफल र पहल गरिए पनि अपेक्षित सुधार हुन नसकेको बताए । उनले ग्यास आपूर्ति व्यवस्थापनसँगै प्रभावकारी बजार अनुगमनको आवश्यकता औँल्याए ।
यसैबीच, इलाका प्रशासन कार्यालय लहानका प्रमुख वेदनिधि खनालले ग्यास डिलरहरूले गोप्य गोदाममार्फत बिक्री गरिरहेको गुनासो प्राप्त भएकाले लहान नगरपालिकासँग समन्वय गरी अनुगमन गर्ने तयारी भइरहेको जानकारी दिए ।
