हरिवन नगरपालिकाले दूध उत्पादन वृद्धि गर्ने उद्देश्यले विभिन्न कृषि तथा पशुपन्छी फर्म र सहकारी संस्थालाई उन्नत जात तथा मुर्रा क्रस भैँसी वितरण गरेको छ ।
नगरपालिकाले शुक्रबार कार्यालय परिसरमा ५० प्रतिशत अनुदानमा २३ वटा दुहुनो भैँसी हस्तान्तरण गरेको हो । नगरपालिकाको पशु विकास शाखाका अनुसार २२ वटा कृषि तथा पशुपन्छी फर्म र एउटा सहकारी संस्थालाई पाडापाडीसहित भैँसी वितरण गरिएको हो ।
टेण्डर प्रक्रियामार्फत खरिद गरिएको एउटा भैँसीको मूल्य एक लाख ७४ हजार ५०० रुपैयाँ परेको नगरपालिकाले जनाएको छ । उक्त रकममध्ये आधा लाभग्राही र आधा नगरपालिकाले व्यहोरेको हो । हरिवन नगरपालिकाका नगरप्रमुख रमेश बुढाथोकीले दूध उत्पादन बढाउने उद्देश्यले उन्नत जातका भैँसी वितरण गरिएको दाबी गरेका छन् । स्थानीय जातका भैँसी पाल्ने क्रम रहे पनि बढी दूध दिने उन्नत जातका भैँसी पालनलाई प्रोत्साहन गर्न कार्यक्रम सञ्चालन गरिएको उनले बताए ।
नगरपालिकाका पशु चिकित्सक डा. महेशकुमार श्रेष्ठका अनुसार हरिवनमा पहिलो पटक यसरी उन्नत जात र मुर्रा क्रस भैँसी वितरण गरिएको हो । यस्ता भैँसीले स्थानीय जातका भैँसीको तुलनामा बढी दूध दिने भएकाले किसानको आम्दानी वृद्धि हुने अपेक्षा गरिएको उनकाे भनाइ छ ।
भैँसी हस्तान्तरण कार्यक्रममा नगरप्रमुख बुढाथोकी, उपप्रमुख हरिमाया घलान, प्रमुख प्रशासकीय अधिकृत हेमराज फुँयाल, वडाध्यक्षहरू, शाखा प्रमुख तथा कर्मचारीहरूको उपस्थिति रहेको थियो ।
