वीरगंज महानगरपालिकाका कार्यवाहक नगर प्रमुख ईम्तियाज आलमले निजी विद्यालय र अभिभावकबीच उत्पन्न हुने जुनसुकै समस्याको समाधानका लागि महानगरपालिका सदैव तयार रहेको बताउनुभएको छ ।
राष्ट्रिय निजी तथा आवासीय विद्यालय एशोसिएसन नेपाल (नेशनल प्याब्सन) नगर कार्य समिति पर्साद्वारा वीरगंजस्थित होटल भिस्वामा आयोजित ‘एसईई २०८२ एक्सिलेन्स अनर अवार्ड’ कार्यक्रममा प्रमुख अतिथिका रूपमा सम्बोधन गर्दै उहाँले शिक्षासम्बन्धी विवाद समाधानमा महानगरपालिकाले निष्पक्ष र उत्तरदायी भूमिका निर्वाह गर्ने प्रतिबद्धता व्यक्त गर्नुभयो ।
कार्यवाहक प्रमुख आलमले विभिन्न समयमा विद्यालय व्यवस्थापन र अभिभावकबीच विभिन्न विषयमा विवाद हुने गरेको उल्लेख गर्दै आर्थिक अभावका कारण महानगरभित्रका कुनै पनि विद्यार्थी शिक्षाबाट वञ्चित हुन नहुनेमा जोड दिनुभयो। उहाँले अभिभावकले विद्यालयको अवस्था बुझ्नुपर्ने र विद्यालयले पनि अभिभावकको पीडा तथा समस्या आत्मसात् गर्नुपर्ने बताउँदै दुवै पक्षबीच आपसी सहकार्य र विश्वासले मात्रै शिक्षा क्षेत्रलाई थप सुदृढ बनाउन सकिने धारणा राख्नुभयो ।
उहाँले विद्यार्थी, अभिभावक र विद्यालयबीचको समन्वयबाट मात्रै गुणस्तरीय शिक्षा सुनिश्चित गर्न सकिने उल्लेख गर्दै आवश्यक पर्दा महानगरपालिका समस्या समाधानका लागि सधैं तयार रहने स्पष्ट पार्नुभयो ।
कार्यक्रममा माध्यमिक शिक्षा परीक्षा (एसईई) २०८२ मा उत्कृष्ट नतिजा हासिल गरेका नेशनल प्याब्सनसँग आबद्ध २० विद्यालयका ५६ जना विद्यार्थीलाई सम्मान गरिएको थियो । पर्सा जिल्लाभर सबैभन्दा उत्कृष्ट नतिजा अर्थात् ४ जीपीए ल्याउन सफल जि.एच.पी. विद्यालयका ६ जना तथा कादम्बरी स्कुलका २ जना विद्यार्थीसहित सम्बन्धित विद्यालयलाई विशेष सम्मान प्रदान गरिएको थियो ।
सम्मानित विद्यार्थीहरूलाई खादा, टीका तथा सम्मानपत्र प्रदान गरिएको कार्यक्रममा वक्ताहरूले उनीहरूको उपलब्धिलाई कडा मेहनत, अनुशासन र गुणस्तरीय शिक्षाको प्रतिफल भएको बताएका थिए ।
कार्यक्रमका अध्यक्ष तथा नेशनल प्याब्सन नगर कार्य समिति पर्साका अध्यक्ष जियालाल गुप्ताले विद्यार्थीहरूको उत्कृष्ट नतिजाले निजी विद्यालयप्रतिको जनविश्वास थप मजबुत बनेको बताउनुभयो । उहाँले विद्यार्थी, शिक्षक, विद्यालय र अभिभावकको संयुक्त प्रयासबाट प्राप्त भएको सफलतालाई आगामी दिनमा पनि निरन्तरता दिँदै गुणस्तरीय, व्यावहारिक र प्रतिस्पर्धात्मक शिक्षामा जोड दिने प्रतिबद्धता व्यक्त गर्नुभयो ।
उहाँले नेशनल प्याब्सन पर्साले आगामी वर्षहरूमा पनि यस्ता प्रेरणादायी सम्मान कार्यक्रमलाई निरन्तरता दिने जानकारी दिनुभयो ।
जियालाल गुप्ताको अध्यक्षतामा सम्पन्न कार्यक्रममा नेशनल प्याब्सनका संस्थापक सदस्य रामबिनय चौरसिया, सचिव सुशील भट्टराई, केन्द्रीय सदस्य अर्बिन्द सिंह, पर्सा हिसानका अध्यक्ष मुकेश गुप्ता, प्याब्सन नगर अध्यक्ष राहुल श्रीवास्तवलगायत विभिन्न विद्यालयका प्रिन्सिपल, शिक्षक, अभिभावक तथा विद्यार्थीहरूको उल्लेखनीय उपस्थिति रहेको थियो ।
.jpg)
.jpg)
.jpg)
.jpg)
