महेन्द्र राजमार्गअन्तर्गत कमला–ढल्केबर–पथलैया सडक विस्तार आयोजनाको प्रगति लक्ष्यभन्दा निकै पछाडि रहेको पाइएको छ ।
हालसम्म करिब ५० प्रतिशत भौतिक प्रगति हासिल भइसक्नुपर्ने भए पनि आयोजनाको प्रगति २६ प्रतिशतमा मात्र सीमित रहेको छ । रुख कटान तथा विद्युत्का पोल, खानेपानीका पाइप, टेलिफोनका तारलगायतका संरचना स्थानान्तरणमा भएको ढिलाइका कारण सडक विस्तारले अपेक्षित गति लिन नसकेको कमला–ढल्केबर–पथलैया सडक आयोजना (पूर्वी खण्ड) का सूचना अधिकारी तथा इन्जिनियर रामटहल यादवले जानकारी दिए ।
विश्व बैंकको ऋण सहयोगमा धनुषाको कमला पुलदेखि बाराको पथलैयासम्म चार लेनको सडक निर्माण गर्ने योजनाअन्तर्गत हालसम्म कमला पुलदेखि सर्लाहीको बागमती पुलसम्मको ७४.७५ किलोमिटर खण्डमा मात्र ठेक्का सम्झौता भई निर्माण कार्य भइरहेको छ । गत वर्ष पुस महिनादेखि सुरु भएको सडक विस्तारको काम सन् २०२७ भित्र सम्पन्न गर्ने लक्ष्य राखिए पनि हालको प्रगतिदर हेर्दा निर्धारित समयभित्र आयोजना सम्पन्न हुने सम्भावना कमजोर देखिएको छ ।
निर्माण कम्पनीका प्रतिनिधिहरूका अनुसार पछिल्लो समय इन्धन तथा निर्माण सामग्रीको मूल्यवृद्धिले समेत निर्माण कार्यलाई प्रभावित पारेको छ। रसुवा कन्स्ट्रक्सन कम्पनीका प्रतिनिधि सुजित रिजालले लागत वृद्धि र विभिन्न प्राविधिक समस्याका कारण कामले अपेक्षित गति लिन नसकेको बताए।
कमला पुलदेखि बागमती पुलसम्मको सडक विस्तार, पुल तथा कलभर्ट निर्माणको जिम्मेवारी इकेके इन्फ्रास्ट्रक्चर लिमिटेड इन्डिया, चिनियाँ कम्पनी एसडब्ल्यु इजे तथा रसुवा कन्स्ट्रक्सन कम्पनी आरसीसीको संयुक्त उपक्रमले पाएका छन् । यद्यपि, निर्माण कम्पनीहरूले आवश्यक जनशक्ति परिचालन नगरेको स्थानीयको गुनासो छ। दैनिक ८ सयदेखि १ हजारसम्म मजदुर खटाउनुपर्ने भए पनि हाल फाट्टफुट्ट रूपमा पुल तथा कलभर्ट निर्माणको काम मात्र भइरहेको देखिन्छ ।
सडक विस्तारको मुख्य काम रोकिएको अवस्था हप्तौँदेखि कायम रहेको छ । यता नेपाल विद्युत् प्राधिकरणले भने विद्युत्का पोल नसारिएकै कारण सडक विस्तारमा ढिलाइ भएको भन्ने आरोप अस्वीकार गरेको छ। नेपाल विद्युत् प्राधिकरण, लालबन्दी वितरण केन्द्रका प्रमुख सुरज ढुङ्गेलका अनुसार सर्लाही खण्डको बाँके जंगल क्षेत्रमा एक सयभन्दा बढी विद्युत्का पोल हटाएर निर्माणस्थल खाली गरिसकिएको छ।
उनले गर्मीयाममा विद्युत् आपूर्ति प्रभावित हुने भएकाले सहर, बजार तथा बस्ती क्षेत्रका पोल तत्काल सार्न सम्भव नभएको र दशैँ–तिहारपछि मात्र उक्त कार्य अघि बढाइने बताए ।
