वीरगंज महानगरपालिकाको मुख्य सडक क्षेत्रमा जारी सडक विस्तार अभियानसँगै निर्माणजन्य फोहोर व्यवस्थापन चुनौती बनेको छ ।
सडक, फुटपाथ र नालामा इँटा, ढुंगा, माटो तथा सिमेन्टका टुक्रा थुप्रिँदा सर्वसाधारणको आवतजावत प्रभावित भएको छ । सडक डिभिजन कार्यालय, हेटौंडाले गत वैशाख ६ गतेदेखि सुरु गरेको सडक विस्तार अभियानअन्तर्गत असार २० गतेदेखि दोस्रो चरणमा दायाँ–बायाँ २५–२५ मिटरभित्र रहेका संरचना हटाउने कार्यलाई तीव्रता दिएको हो ।
अभियानअन्तर्गत गण्डक चोकदेखि मितेरी पुलसम्म करिब १ हजार २०० घर तथा संरचना हटाउने काम भइरहेको छ । हालसम्म गण्डक चोकदेखि घण्टाघरसम्म तथा मितेरी पुलदेखि बिर्ताचोकसम्मका संरचना डोजर प्रयोग गरी हटाइसकिएको छ । बाँकी बिर्ताचोकदेखि घण्टाघरसम्मको क्षेत्रमा भने चौथो गहवामाई रथयात्रा सम्पन्न भएपछि संरचना हटाउने तयारी रहेको जनाइएको छ ।
संरचना भत्काएपछि पुनः प्रयोग गर्न मिल्ने इँटा, छडलगायत सामग्री घरधनीहरूले लगे पनि अन्य निर्माणजन्य फोहोर सडक, फुटपाथ र नालामै थुप्रिएको छ । फोहोर व्यवस्थापनको जिम्मेवारी स्पष्ट नहुँदा वीरगंजको मुख्य सडक क्षेत्र थप अव्यवस्थित बन्दै गएको स्थानीयको गुनासो छ । निर्माणजन्य फोहोरका कारण नाला थुनिँदा वर्षाको पानी सडकमा जम्न थालेको छ । यसले पैदलयात्रीलाई समस्या भएको छ भने सवारी आवागमनमा समेत असर परेको छ । सडकमा पानी जम्दा ट्राफिक व्यवस्थापन चुनौतीपूर्ण बनेको र दुर्घटनाको जोखिम बढेको स्थानीयले बताएका छन् ।
वीरगंज महानगरपालिकाका सरसफाइ प्रमुख सर्फुद्दीन मियाँले महानगरले नियमित रूपमा नगर क्षेत्रको फोहोर सङ्कलन गरिरहेको भए पनि सडक विस्तारका क्रममा भत्काइएका संरचनाबाट निस्किएको निर्माणजन्य फोहोर व्यवस्थापनको जिम्मेवारी स्पष्ट नभएको बताए ।
उनका अनुसार पछिल्लो एक सातादेखि नाला थुनिएर पानी जमेको स्थानमा महानगरले सफाइ तथा पानी निकास खुलाउने काम गरिरहेको छ । तर सडक विस्तारबाट उत्पन्न फोहोर व्यवस्थापनसम्बन्धी अन्य निर्णय प्रमुख प्रशासकीय अधिकृत तथा कार्यवाहक नगरप्रमुखको निर्देशनअनुसार हुने उनले जानकारी दिए ।
मियाँले सडक विस्तारका क्रममा निस्किएको फोहोर हटाउने विषयमा सडक डिभिजन कार्यालय र सम्बन्धित जग्गाधनीबाट अपेक्षित सक्रियता नदेखिएको बताए । त्यसकै कारण वीरगञ्जको मुख्य सडक क्षेत्र अस्तव्यस्त बनेको उनको भनाइ छ ।
स्थानीयवासीले सडक विस्तार आवश्यक भए पनि फोहोर व्यवस्थापन, नाला सफाइ र ट्राफिक व्यवस्थापनलाई समेत समान प्राथमिकता दिनुपर्ने माग गरेका छन् । उनीहरूले सम्बन्धित निकायबीच तत्काल समन्वय गरी निर्माणजन्य फोहोर हटाउन र सडकलाई सुरक्षित तथा व्यवस्थित बनाउन पहल गर्न आग्रह गरेका छन् ।
