सङ्घीय सरकारले डिजिटल नेपाल अभियानलाई प्राथमिकताका साथ अघि बढाइरहेका बेला पर्साको ठोरी गाउँपालिका भने अझै भरपर्दो मोबाइल तथा इन्टरनेट सेवाबाट वञ्चित रहेको स्थानीयवासीले गुनासो गरेका छन् । सामान्य वर्षा, हावाहुरी वा विद्युत् अवरुद्ध हुनेबित्तिकै नेपाल टेलिकमको नेटवर्क पूर्णरूपमा बन्द हुने समस्याले स्थानीयवासी, व्यवसायी, विद्यार्थी तथा पर्यटकलाई दैनिक सास्ती खेप्न बाध्य बनाएको उनीहरूको भनाइ छ ।
ठोरी, ब्रह्मनगर, विजयबस्ती र सुवर्णपुरमा नेपाल टेलिकमका टावर सञ्चालनमा रहे पनि पर्याप्त ब्याकअप विद्युत् प्रणालीको अभावका कारण विद्युत् आपूर्ति बन्द हुनासाथ मोबाइल तथा इन्टरनेट सेवा ठप्प हुने गरेको स्थानीयको आरोप छ । यसबाट बैंकिङ सेवा, अनलाइन कारोबार, शैक्षिक गतिविधि, सरकारी सेवा तथा पारिवारिक सम्पर्कसमेत प्रभावित हुने गरेको उनीहरूले बताएका छन् ।
स्थानीय व्यवसायी विनोद पराजुलीले सञ्चार सेवा नागरिकको आधारभूत आवश्यकता भए पनि ठोरीमा सामान्य मौसम परिवर्तनसँगै नेटवर्क अवरुद्ध हुने अवस्था रहेको बताए । समस्या समाधानका लागि नेपाल टेलिकमलाई पटक–पटक मौखिक तथा लिखित रूपमा जानकारी गराए पनि प्रभावकारी पहल नभएको उनको गुनासो छ । अर्का व्यवसायी दिनेश नेपालले गाउँपालिकाका केही क्षेत्रमा अझै पनि मोबाइलमा नेटवर्क टिपाउन घरको छत वा खुला स्थानमा पुग्नुपर्ने अवस्था रहेको उल्लेख गर्दै डिजिटल नेपालको नारासँग स्थानीयको वास्तविक अवस्था मेल नखाने बताए ।
ठोरी महत्वपूर्ण पर्यटकीय तथा सीमावर्ती क्षेत्र भएकाले यहाँ दैनिक रूपमा स्वदेशी तथा भारतीय पर्यटकको आवागमन हुने गर्छ । तर कमजोर मोबाइल तथा इन्टरनेट सेवाका कारण होटल बुकिङ, अनलाइन भुक्तानी, डिजिटल कारोबार तथा यात्रासम्बन्धी सेवामा समस्या उत्पन्न हुने गरेको पर्यटन व्यवसायीहरूको भनाइ छ । सुवर्णपुरका अमृत श्रेष्ठका अनुसार पर्यटकबाट सबैभन्दा बढी गुनासो नेटवर्क सेवाकै विषयमा आउने गरेको छ।
बुद्धनगरका भीष्म घिमिरेले आपत्कालीन अवस्थामा नेटवर्क अवरुद्ध हुँदा एम्बुलेन्स, प्रहरी वा आफन्तसँग सम्पर्क गर्नसमेत कठिन हुने भएकाले यो विषय नागरिकको जीवन सुरक्षासँग प्रत्यक्ष रूपमा जोडिएको बताए । स्थानीयवासीले नेपाल दूरसञ्चार प्राधिकरण, नेपाल टेलिकम तथा सञ्चार तथा सूचना प्रविधि मन्त्रालयसँग ठोरी क्षेत्रका सबै टावरमा उच्च क्षमताको ब्याकअप विद्युत् प्रणाली जडान गर्न, कमजोर नेटवर्क भएका क्षेत्रमा थप प्राविधिक उपकरण स्थापना गर्न तथा सेवा गुणस्तरको प्राविधिक परीक्षण गरी दीर्घकालीन समाधान लागू गर्न माग गरेका छन् ।
उनीहरूले सीमावर्ती तथा पर्यटकीय क्षेत्रलाई भरपर्दो सञ्चार सेवाबाट वञ्चित राख्नु डिजिटल नेपाल अभियानकै उद्देश्यविपरीत भएको उल्लेख गर्दै सम्बन्धित निकायले तत्काल सुधारका लागि पहल नगरे चरणबद्ध आन्दोलनमा उत्रिन बाध्य हुने चेतावनीसमेत दिएका छन् ।
