किसानहरूको सुविधा र कृषि उत्पादन लागत घटाउने उद्देश्यले खेत जोताइको अधिकतम शुल्क निर्धारण गरेको छ ।
ट्रयाक्टरबाट खेताई जोताइको दर रेट निर्धारण, प्रतिघण्टा बढीमा फारबाट १६ सय र रोटाभेटरबाट २१ सय रुपैयाँ मात्रै लिन पाउने व्यवस्था भएकाे हाे । धनुषाको जनकनन्दिनी गाउँपालिकाले एक सूचना जारी गर्दै ट्र्याक्टर व्यवसायीहरूले मनपरी शुल्क असुल्ने गरेको गुनासो आएपछि दररेट निर्धारण गरिएको जनाएको हो ।
गाउँपालिका अध्यक्ष दिपिनदेव यादव, उपाध्यक्ष कमला सहगल र प्रमुख प्रशासकीय अधिकृत सन्तोषकुमार शर्मासहितको संयुक्त बैठकले खेत जोताइ तथा कृषि उपकरण प्रयोगको अधिकतम शुल्क तय गरेको जनाएको छ ।
जारी सूचनाअनुसार निजी ट्र्याक्टरबाट फार (हल) प्रयोग गरी खेत जोतेबापत प्रतिघण्टा अधिकतम १६ सय रुपैयाँ मात्र लिन पाइनेछ । त्यस्तै रोटाभेटर प्रयोग गरी खेत जोतेको अवस्थामा प्रतिघण्टा अधिकतम २१ सय रुपैयाँ शुल्क लिन सकिने व्यवस्था गरेको छ ।
गाउँपालिकाले आफ्नै ट्र्याक्टर मार्फत रोटाभेटर सेवा उपलब्ध गराउँदा प्रतिघण्टा एक हजार आठ सय रुपैयाँ शुल्क निर्धारण गरेको छ, जुन निजी क्षेत्रको दरभन्दा ३०० रुपैयाँ कम रहेको जनाइएको छ ।
यस्तै, गाउँपालिकाको ब्याकहो लोडर प्रयोग गर्नुपर्ने अवस्थामा प्रतिघण्टा दुई हजार रुपैयाँ शुल्क लाग्ने व्यवस्था गरिएको छ ।
गाउँपालिकाले किसानहरूको उत्पादन लागत बढ्दै गएको र कृषि कार्यलाई सहज तथा व्यवस्थित बनाउन दररेट निर्धारण गरिएको जनाएको छ । यसका साथै, तोकिएको शुल्कभन्दा बढी रकम मागेमा वा असुलेमा गाउँपालिकामा उजुरी गर्न सकिने र प्राप्त उजुरीका आधारमा आवश्यक कारबाही प्रक्रिया अघि बढाइने चेतावनी दिएको छ ।
यसैबीच, गाउँपालिकाले एम्बुलेन्स सेवा पनि तोकिएको दरअनुसार उपलब्ध गराइने जनाएको छ । गाउँपालिका क्षेत्रभित्रका गर्भवती महिलालाई घरबाट बर्थिङ सेन्टरसम्म निःशुल्क एम्बुलेन्स सेवा उपलब्ध गराइने तथा बर्थिङ सेन्टरबाट जनकपुर रेफर गर्नुपरेमा समेत निःशुल्क सेवा प्रदान गरिने सूचनामा उल्लेख छ ।
स्थानीय तहबाट कृषि सेवा तथा किसानमैत्री नीति लागू गर्ने क्रममा जनकनन्दिनी गाउँपालिका धनुषामै यस्तो व्यवस्था लागू गर्ने पहिलो पालिका बनेको दाबी गरेको छ ।
