सप्तरी । सप्तरीमा मोटरसाइकलको ठक्करबाट एक बालकको मृत्यु भएपछि उनलाई मोटरसाइकलमै राखेर घटनास्थलबाट भाग्ने प्रयास गरेका एक भारतीय नागरिक पक्राउ परेका छन् । पक्राउ पर्नेमा भारत, बिहार राज्यको मधुवनी जिल्ला खतौनी पिपराही निवासी २८ वर्षीय मो. सादर आलम रहेका छन् ।
जिल्ला प्रहरी कार्यालय सप्तरीका अनुसार बुधबार साँझ करिब ६ः५० बजे पूर्व–पश्चिम राजमार्गअन्तर्गत शम्भुनाथ नगरपालिका–६ कठौनामा पूर्वबाट पश्चिमतर्फ जाँदै गरेको बीआर ३२ बीडी ९७६४ नम्बरको भारतीय मोटरसाइकलले विपरीत दिशाबाट आइरहेको साइकललाई ठक्कर दिएको थियो। दुर्घटनामा साइकल चालक शम्भुनाथ नगरपालिका–५ निवासी मो. सादनका १४ वर्षीय छोरा मो. साविक गम्भीर घाइते भएका थिए ।
दुर्घटनापछि मोटरसाइकल चालक आलमले घाइते बालकलाई सोही मोटरसाइकलमा राखेर घटनास्थलबाट लगेका थिए। बालकलाई खडक नगरपालिका–१ सिस्वाबेल्ही क्षेत्रमा फेला पारेपछि स्थानीयले मोटरसाइकलसहित चालकलाई नियन्त्रणमा लिई प्रहरीलाई बुझाएका थिए। घटनाका क्रममा मोटरसाइकलमा सवार अर्का एक व्यक्ति भने फरार रहेको स्थानीयले बताएका छन् ।
स्थानीयका अनुसार चालक आलमले पूर्व–पश्चिम राजमार्गको खडक नगरपालिका–५ खरचुहिया चोकबाट दक्षिणतर्फको भित्री सडक हुँदै भारततर्फ भाग्ने प्रयास गरेका थिए। मृतक बालकलाई बाटोमै छाडेर भाग्न खोजेको आरोपसमेत उनीमाथि लागेको छ ।
दुर्घटनामा गम्भीर घाइते भएका बालकको मृत्यु भएको प्रहरीले जनाएको छ । उनको शव पोस्टमार्टमका लागि गजेन्द्रनारायण सिंह अस्पताल पठाइएको छ । पक्राउ परेका आलम र दुर्घटनामा संलग्न मोटरसाइकललाई इलाका प्रहरी कार्यालय कल्याणपुरको नियन्त्रणमा राखी थप अनुसन्धान तथा कानुनी कारबाही अघि बढाइएको सप्तरी प्रहरीका प्रवक्ता डीएसपी हेमराज घिमिरेले जानकारी दिए।
प्रहरीका अनुसार दुर्घटनापछि चालकले घाइते बालकलाई किन मोटरसाइकलमा राखेर लगेको भन्ने विषयमा अनुसन्धान भइरहेको छ । अनुसन्धानको निष्कर्षपछि थप विवरण सार्वजनिक गरिने डीएसपी घिमिरेले बताए ।
घटनापछि आक्रोशित आफन्त तथा स्थानीयवासीले बिहीबार बिहान पूर्व–पश्चिम राजमार्गअन्तर्गत शम्भुनाथ नगरपालिका–६ कठौनामा करिब ३० मिनेट सडक अवरुद्ध गरेका थिए। उनीहरूले दुर्घटनामा संलग्न चालकलाई कडा कारबाही गर्न तथा मृतक बालकका परिवारलाई उचित क्षतिपूर्ति उपलब्ध गराउन माग गरेका छन् ।
