बुधबार दिउँसोदेखि विद्युत् आपूर्ति अवरुद्ध भएपछि वीरगंज महानगरपालिकाका विभिन्न क्षेत्रमा खानेपानीको समस्या उत्पन्न भएको छ । विद्युत् अभावका कारण धारामा पानी आउन छाडेपछि तथा घरघरमा जडान गरिएका विद्युतीय मोटर सञ्चालन हुन नसकेपछि नगरवासीले खानेपानीको अभाव झेल्नुपरेको थियो ।
गर्मीको मौसममा पिउने पानीको समस्या चर्किएपछि वीरगंज महानगरपालिकाले कार्यवाहक नगरप्रमुख इम्तियाज आलमको निर्देशनमा बुधबार राति नै प्रभावित क्षेत्रमा खानेपानी वितरणको व्यवस्था मिलाएको छ ।
महानगरपालिकाका अनुसार बुधबार दिउँसो करिब ३ बजेदेखि विद्युत् आपूर्ति अवरुद्ध भएपछि महानगरका अधिकांश वडामा खानेपानी आपूर्तिमा समस्या देखिएको थियो । नागरिकबाट गुनासो आउन थालेपछि कार्यवाहक नगरप्रमुख आलमले तत्काल पानी ट्याङ्कर परिचालन गर्न निर्देशन दिएका थिए ।
उनकै पहलमा महानगरपालिकाका पानी ट्याङ्करहरू रातिसम्म प्रभावित टोल तथा बस्तीमा परिचालन गरी सुरक्षित खानेपानी वितरण गरिएको थियो । वितरण कार्यको अनुगमनसमेत कार्यवाहक नगरप्रमुख आलमले गरेका थिए ।
मध्यरातसम्म घरनजिकै पानीको ट्याङ्कर पुगेपछि स्थानीयवासीले राहत महसुस गरेको बताएका छन् । आकस्मिक परिस्थितिमा महानगरपालिकाले देखाएको सक्रियता र छिटो निर्णयको उनीहरूले प्रशंसा गरेका छन् ।
स्थानीयवासीका अनुसार विद्युत् अवरुद्ध भएपछि पिउने पानीसमेत नपाउने अवस्था सिर्जना भएको थियो । महानगरपालिकाले राति नै ट्याङ्करमार्फत पानी उपलब्ध गराएपछि समस्या केही हदसम्म समाधान भएको उनीहरूको भनाइ छ ।
यस विषयमा वीरगंज महानगरपालिकाले आगामी दिनमा पनि प्राकृतिक विपद् वा अन्य आकस्मिक परिस्थितिमा नागरिकलाई आधारभूत सेवा उपलब्ध गराउन आवश्यक सबै व्यवस्था मिलाइने जनाएको छ । कार्यवाहक नगरप्रमुख आलमले नागरिकको आधारभूत आवश्यकता पूरा गर्नु महानगरपालिकाको पहिलो दायित्व भएको उल्लेख गर्दै विपद् तथा अप्ठ्यारो परिस्थितिमा महानगर सधैँ नगरवासीको साथमा रहने प्रतिबद्धता व्यक्त गरेका छन् ।
महानगरपालिकाले विद्युत् आपूर्ति पूर्ण रूपमा सहज नहुन्जेल आवश्यकताअनुसार वैकल्पिक माध्यमबाट खानेपानी वितरणलाई निरन्तरता दिइने जनाएको छ ।
