नक्कली ब्रान्डका पाइप उत्पादन तथा बिक्री गरेको आरोपमा जानकी प्लास्टिक उद्योगका सञ्चालक नवकृष्ण मुरारका पक्राउ परेका छन् ।
जिल्ला प्रहरी कार्यालय धनुषाका अनुसार मुरारकालाई बिहीबार जनकपुरधाम उपमहानगरपालिका–४ मुजेलिया क्षेत्रबाट पक्राउ गरिएको हो । प्रहरीले उनलाई मार्बल कम्पनीको ट्रेडमार्क तथा ब्रान्डको दुरुपयोग गर्दै नक्कली पाइप उत्पादन र बजारमा बिक्री वितरण गरेको आरोपमा नियन्त्रणमा लिएको जनाएको छ ।
प्रहरीका अनुसार उद्योगबाट उत्पादन गरिएका पाइपमा अर्कै कम्पनीको ट्रेडमार्क प्रयोग गरिएको प्रारम्भिक अनुसन्धानबाट खुलेको छ । उक्त विषयमा उजुरी परेपछि प्रहरीले अनुसन्धान अघि बढाएको थियो । पक्राउ परेका मुरारकालाई हाल वडा प्रहरी कार्यालय मुजेलियाको हिरासतमा राखिएको छ । उनीमाथि ट्रेडमार्क दुरुपयोग, बौद्धिक सम्पत्ति अधिकार उल्लङ्घन तथा उपभोक्ता ठगीसम्बन्धी विषयमा थप अनुसन्धान भइरहेको प्रहरीले जनाएको छ ।
घटनाबारे आवश्यक प्रमाण संकलन तथा कानुनी प्रक्रिया अगाडि बढाइएको र अनुसन्धानको निष्कर्षका आधारमा थप कारबाही बढ्ने प्रहरीको भनाइ रहेकाे छ ।
