मधेश प्रदेशमा डुबेर बालबालिकाको मृत्यु हुने घटना निरन्तर बढिरहेका बेला बारामा फेरि एक बालिकाले ज्यान गुमाएकी छन् ।
सिरहामा खाल्डोमा जमेको पानीमा डुबेर एकै परिवारका तीन जना बालबालिकाको मृत्यु भएको चार दिन नबित्दै बारामा ११ वर्षीया बालिकाको डुबेर मृत्यु भएको हो । बाराको करैयामाई गाउँपालिका–३ गालोपाट्टी निवासी शिवनारायण चौधरीकी ११ वर्षीया छोरी रोशनी चौधरीको इँटा उद्योगले माटो निकाल्न खनेको खाल्डोमा डुबेर मृत्यु भएको प्रहरीले जनाएको छ ।
बुधबार साँझ करिब ५ बजे गौतम इँटा उद्योगले माटो उत्खननका लागि खनेको खाल्डोमा बाख्रा चराउन गएकी रोशनी डुबेको अवस्थामा फेला परेकी थिइन् । यसअघि गत आइतबार सिरहाको गोलबजार नगरपालिका–७ स्थित पुरानो चोक चोहर्वामा रहेको पशुहाट बजार नजिकको खाल्डोमा जमेको पानीमा डुबेर एकै परिवारका तीन जना बालबालिकाको मृत्यु भएको थियो ।
मृत्यु हुनेमा स्थानीय अवास शेख र सबिना खातुनका १२ वर्षीया छोरी सबनम खातुन, १० वर्षीया छोरी रुबिना खातुन तथा ७ वर्षीय छोरा साइफुल शेख रहेका छन् । उनीहरूका परिवार कवाड तथा प्लास्टिकजन्य सामग्री संकलन गरेर जीविकोपार्जन गर्दै आएका थिए । यस्तै, आइतबार नै बाराको कलैया उपमहानगरपालिका–११ घोघडरियास्थित एक पोखरीमा नुहाउने क्रममा स्थानीय सन्तोष पासवानकी ६ वर्षीया छोरी राधिका कुमारीको पनि डुबेर मृत्यु भएको थियो ।
मधेश प्रदेशमा सरकारको प्रभावकारी नियमन अभावका कारण जथाभावी खनिएका खाल्डा, नदी तथा खोलाबाट गरिएको ग्राभेल उत्खननपछि बनेका खाडल, माछापोखरी तथा अन्य जलाशयहरू बालबालिकाका लागि जोखिमपूर्ण बन्दै गएका छन् । प्रहरी तथ्यांकअनुसार पछिल्लो चार वर्षमा मधेश प्रदेशमा यस्ता खाल्डा, पोखरी तथा जलाशयमा डुबेर करिब साढे चार सय बालबालिकाले ज्यान गुमाइसकेका छन्। वर्षेनी सयभन्दा बढी बालबालिकाको डुबेर मृत्यु हुने गरेको तथ्यांकले देखाएको छ ।
मधेश प्रदेश प्रहरी कार्यालय जनकपुरका अनुसार आर्थिक वर्ष २०८२/८३ को जेठ मसान्तसम्म मात्रै मधेश प्रदेशमा डुबेर १११ जना बालबालिकाको मृत्यु भएको छ। तीमध्ये ५७ जना बालक र ५४ जना बालिका रहेका छन् । जिल्लागत विवरणअनुसार सबैभन्दा बढी रौतहटमा २४ जना बालबालिकाको डुबेर मृत्यु भएको छ । त्यसैगरी सप्तरीमा १७ जना, सिरहामा १६ जना, धनुषा र सर्लाहीमा १३/१३ जना, महोत्तरीमा १२ जना, बारामा ११ जना तथा पर्सामा पाँच जना बालबालिकाले डुबेर ज्यान गुमाएका छन् ।
आर्थिक वर्ष २०८१/८२ मा पनि डुबेर १५० जना बालबालिकाको मृत्यु भएको थियो, जसमध्ये ९६ जना बालक र ५४ जना बालिका थिए ।
विज्ञहरूका अनुसार गाउँ–गाउँमा रहेका माछापोखरी, नुहाउने तथा लुगा धुने पोखरी, विकास निर्माणका लागि खनेर छाडिएका खाल्डाखुल्डी तथा नदी–खोलाबाट गरिएको माटो र ग्राभेल उत्खननपछि बनेका खाल्डाहरू बालबालिकाको सुरक्षाका लागि गम्भीर चुनौती बन्दै गएका छन् ।
