बाराको सिमरास्थित आन्तरिक राजस्व कार्यालयले गत आर्थिक वर्षमा राजस्व संकलनसँगै करदाताको संख्या पनि उल्लेख्य रूपमा बढाएको छ ।
कार्यालयका अनुसार आर्थिक वर्ष २०८२/८३ मा १७ करोड ८१ लाख ६७ हजार रुपैयाँभन्दा बढी राजस्व संकलन भएको छ । आर्थिक वर्ष २०८१/८२ मा १५ करोड २२ लाख ७७ हजार रुपैयाँभन्दा बढी राजस्व संकलन भएको थियो । अघिल्लो आर्थिक वर्षको तुलनामा गत आवमा राजस्व संकलन करिब १७ प्रतिशतले वृद्धि भएको आन्तरिक राजस्व कार्यालय सिमराका प्रमुख दिनेश पाण्डेले जानकारी दिए ।
कार्यालयका अनुसार गत आवमा राजस्व संकलनमा आयकरको हिस्सा सबैभन्दा ठूलो रहेको छ। आयकरतर्फ १७ करोड ४२ लाख रुपैयाँभन्दा बढी संकलन भएको छ । अघिल्लो आर्थिक वर्षको तुलनामा आयकर संकलनमा १०४ प्रतिशतभन्दा बढी वृद्धि भएको कार्यालयले जनाएको छ ।
त्यस्तै, मूल्य अभिवृद्धि कर (भ्याट) बाट १५ करोड २८ लाख रुपैयाँभन्दा बढी राजस्व संकलन भएको छ । भ्याटतर्फको राजस्व अघिल्लो वर्षको तुलनामा करिब ४१ प्रतिशतले बढेको कार्यालयको तथ्याङ्कमा उल्लेख छ । अन्तःशुल्कतर्फ भने ११ करोड ६६ लाख रुपैयाँभन्दा बढी राजस्व संकलन भएको छ ।
राजस्व संकलनसँगै कार्यालयको करदाता आधारसमेत विस्तार भएको छ। आर्थिक वर्ष २०८१/८२ मा ८४ हजार ४८४ करदाता दर्ता रहेकोमा गत आवमा यो संख्या बढेर ९३ हजार १०९ पुगेको छ । गत आवमा आयकरतर्फ १६ हजार ४५४, भ्याटतर्फ १० हजार २४५ र अन्तःशुल्कतर्फ १ हजार ६४८ करदाता दर्ता भएका छन् । व्यक्तिगत स्थायी लेखा नम्बर (प्यान) लिने करदाताको संख्या ६४ हजार ६ सय पुगेको छ भने डब्ल्युप्यानतर्फ १६२ करदाता दर्ता भएका छन् ।
कार्यालय प्रमुख पाण्डेका अनुसार राजस्व संकलन र करदाता दर्ता दुवैमा भएको वृद्धिले सिमरा क्षेत्रमा कर प्रशासनप्रति सहभागिता बढ्दै गएको देखाएको छ । करको दायरा विस्तार हुनु र नयाँ करदाता कर प्रणालीमा आबद्ध हुनु राजस्व परिचालनका दृष्टिले सकारात्मक संकेत भएको कार्यालयको निष्कर्ष छ ।
