महोत्तरी । हुलाकी राजमार्गअन्तर्गत जनकपुर–भिठ्ठामोड सडकखण्डमा पर्ने महोत्तरी गाउँपालिका–१ पर्सास्थित निर्माणाधीन कुटमेश्वरी पुल लामो समयदेखि अलपत्र पर्दा स्थानीयवासी र यात्रुले दैनिक सास्ती व्यहोर्न बाध्य भएका छन् । सडकको अधिकांश भाग निर्माण सम्पन्न भइसके पनि पुल अधुरै रहँदा आवागमन जोखिमपूर्ण बनेको हो ।
भारतसँगको व्यापार, धार्मिक पर्यटन तथा स्थानीय आवागमनलाई सहज बनाउने उद्देश्यले निर्माण गरिएको हुलाकी राजमार्गको अधिकांश खण्ड सञ्चालनमा आइसकेको छ । तर बिगही खोलामाथिको कुटमेश्वरी पुल निर्माणमा भएको ढिलाइले स्थानीयको दैनिक जनजीवन प्रभावित भएको छ ।
पुल निर्माण अधुरै रहेकाले बालुवा र माटोले बनाइएको अस्थायी डाइभर्सनमार्फत सवारीसाधन सञ्चालन हुँदै आएको छ । स्थानीय सुरेश साहका अनुसार साँघुरो र जीर्ण वैकल्पिक बाटोमा सवारीको अत्यधिक चापका कारण दैनिक रूपमा घण्टौँसम्म जाम हुने गरेको छ। वर्षायाममा खोलाको बहाव बढ्दा डाइभर्सन बग्ने भएकाले आवागमन झन् जोखिमपूर्ण बन्ने गरेको उहाँले बताउनुभयो ।
स्थानीय सञ्जीकुमार मिश्रका अनुसार कतिपय अवस्थामा यात्रुहरूलाई लामो दूरी घुमेर गन्तव्यमा पुग्नुपर्ने बाध्यता छ। एम्बुलेन्स, विद्यालयका सवारीसाधन तथा अन्य अत्यावश्यक सेवासमेत प्रभावित हुने गरेको उहाँले बताउनुभयो । पटक–पटक सम्बन्धित निकाय र निर्माण कम्पनीको ध्यानाकर्षण गराए पनि निर्माण कार्यले अपेक्षित गति लिन नसकेको उहाँको गुनासो छ ।
स्थानीयले सडक सञ्चालनमा आएपछि पुल पनि छिट्टै सम्पन्न हुने अपेक्षा गरेका थिए। तर निर्माणमा भएको निरन्तर ढिलाइले नागरिकमा निराशा बढ्दै गएको छ ।
कुटमेश्वरी पुल निर्माणका लागि विसं २०७९ फागुनमा रामजानकी निर्माण सेवा, जनकपुरधामसँग करिब २० करोड रुपैयाँमा ठेक्का सम्झौता गरिएको थियो । हुलाकी राजमार्ग निर्देशनालय आयोजना कार्यालय, जनकपुरधामका अनुसार पछिल्लो पटक २०८३ साउन ११ गतेसम्मका लागि म्याद थप गरिएको भए पनि हालसम्म करिब ५० प्रतिशत मात्र काम सम्पन्न भएको छ ।
आयोजना कार्यालयका प्रमुख कृष्णकुमार महतोले बजेट अभावका कारण निर्माण कार्य प्रभावित भएको बताउनुभयो। उहाँका अनुसार निर्माण व्यवसायीले काम जारी राखेकाले केही महिनाका लागि पुनः म्याद थप गरी निर्माणलाई तीव्रता दिने तयारी भइरहेको छ ।
स्थानीयवासीका अनुसार विशेषगरी वर्षायाममा पुल नहुँदा समस्या थप गम्भीर बन्ने गरेको छ। खोलामा पानीको बहाव बढेपछि आवतजावत कठिन हुनुका साथै दुर्घटनाको जोखिमसमेत बढ्ने गरेको उनीहरूको भनाइ छ ।
