सरकारले विराटनगर जुट मिल पुनः सञ्चालनका लागि आर्थिक, प्राविधिक तथा कानुनी अवस्था अध्ययन गर्न विज्ञसहितको कार्यदल गठन गरेको छ । प्रधानमन्त्री तथा मन्त्रिपरिषद्को कार्यालयमा सोमबार बसेको विभिन्न मन्त्रालयका सचिवहरूको बैठकले कार्यदल गठन गरेको हो ।
उद्योग, वाणिज्य तथा आपूर्ति मन्त्रालयका संस्थान हेर्ने सहसचिवको संयोजकत्वमा गठित कार्यदलले मिलका भौतिक संरचना, मेसिनरी, सम्पत्ति तथा दायित्वको अवस्था र यसअघि भएका अध्ययन तथा निर्णयहरूको समीक्षा गर्नेछ ।
कार्यदलले पुनः सञ्चालनका सम्भावित विकल्प र आवश्यक रणनीतिसहितको प्रतिवेदन एक महिनाभित्र उद्योग, वाणिज्य तथा आपूर्ति मन्त्रालयमा पेस गर्नेछ ।
बैठकमा प्रधानमन्त्री कार्यालयका सचिव वीरेन्द्रकुमार यादवका साथै अर्थ सचिव र उद्योग, वाणिज्य तथा आपूर्ति मन्त्रालयका सचिवसहित सम्बन्धित मन्त्रालयका अधिकारी तथा सरोकारवालाहरू सहभागी थिए । बैठकमा जुट मिलको व्यवस्थापन, सञ्चालनको सम्भावना, विद्यमान समस्या तथा पुनः सञ्चालनका लागि अपनाउन सकिने विभिन्न विकल्पबारे छलफल भएको थियो ।
यस्तो हुनेछ कार्यदलको कार्यादेश
१. विराटनगर जुट मिल सञ्चालन सम्बन्धमा यसअघि लिइएका निर्णय तथा विभिन्न निकायबाट गठन भएका कार्यदलले पेस गरेका प्रतिवेदनका सुझाव/सिफारिस अध्ययन गर्ने ।
२. विराटनगर जुट मिलको वित्तीय, आर्थिक, प्राविधिक तथा कानुनी पक्षको विद्यमान अवस्थाको अध्ययन/विश्लेषण गर्ने र अन्तर्निहित समस्या पहिचान गर्ने ।
३. विराटनगर जुट मिल परिसरमा रहेका भवन, कारखाना लगायतका भौतिक संरचनाहरू, मेसिनरी एवं पार्टपुर्जाको विद्यमान अवस्था र तिनको उपयोगको सम्भाव्यताको गहन विश्लेषण गरी प्रयोग गर्न सकिने भवन, मेसिनरी/उपकरणहरू तथा सञ्चालनका लागि आवश्यक हुने उपकरण/मेसिनरीको विवरण यकिन गर्ने र प्रयोगमा आउन सक्ने भौतिक संरचना, भवन, मेसिनरी/उपकरणहरूको मर्मत लागत अनुमान तयार गर्ने ।
४. विराटनगर जुट मिलको स्वामित्वमा रहेको जग्गा लगायतको सम्पत्ति तथा दायित्वसम्बन्धी विषयको अध्ययन गर्ने र फरफारकका लागि कानुनी तथा व्यावहारिक सुझाव पेस गर्ने ।
५. विराटनगर जुट मिल सञ्चालनका लागि लाभ–लागत विश्लेषणसहितका सम्भावित विकल्पहरू पहिचान गर्ने र उपयुक्त विकल्प सिफारिस गर्ने ।
६. विराटनगर जुट मिल सञ्चालनका नीतिगत, संरचनागत तथा कानुनी सुधारका तत्कालीन र दीर्घकालीन रणनीतिहरू कार्यान्वयन योजनासहित सिफारिस गर्ने ।
७. कार्यदलले उपयुक्त ठानेका सुझाव तथा सिफारिस गर्ने ।
