साउन महिनामा बोलबम यात्रुको चाप बढेसँगै मधेस प्रदेशका सडकमा यात्रु तथा उनीहरू सवार सवारीसाधनको आवागमन बढेको छ ।
यात्रुको चापलाई ध्यानमा राख्दै नेपाल प्रहरी र ट्राफिक प्रहरीले सुरक्षा तथा ट्राफिक व्यवस्थापनमा सतर्कता बढाएका छन् । जिल्ला ट्राफिक प्रहरी कार्यालय सर्लाहीका प्रमुख एवं प्रहरी निरीक्षक झलक शर्माका अनुसार पछिल्लो दुई दिनयता विशेषगरी महेन्द्र राजमार्ग र नवलपुर–मलङ्गवा सडकमा सवारीसाधनको चाप अत्यधिक बढेको छ ।
हरेक वर्ष साउन महिनाको अन्तिमतिर सर्लाही र रौतहटको सीमाबाट बग्ने बागमती नदीमा जल उठाउन आउने बोलबम यात्रुको ठूलो भीड लाग्ने गर्छ । यात्रुको भीड व्यवस्थापन गर्न ट्राफिक प्रहरी तथा नेपाल प्रहरीलाई चुनौती हुने गरेको छ । प्रहरी निरीक्षक शर्माले मानिस तथा सवारीसाधनको आवागमन बाक्लिँदा दुर्घटनाको जोखिमसमेत बढ्ने भएकाले सुरक्षाकर्मीको उपस्थिति बढाइएको बताए । उनका अनुसार यात्रु तथा सवारीसाधनको चाप बढे पनि हाल अवस्था सामान्य नै रहेको छ ।
यस अवधिमा कतिपय यात्रुले जोखिमपूर्ण ढंगले यात्रा गर्ने भएकाले ट्राफिक नियम पालना गर्न सम्झाइबुझाइसमेत गर्ने गरिएको जिल्ला ट्राफिक प्रहरी कार्यालय सर्लाहीले जनाएको छ । निर्माणाधीन रहेकाले महेन्द्र राजमार्गलगायत अन्य सडकको अवस्था खराब रहेको भन्दै सावधानीपूर्वक सवारीसाधन चलाउन तथा यात्रा गर्न यात्रुलाई सचेत गराउने काम भइरहेको शर्माले बताए ।
विशेषगरी बागमती पुल आसपासका क्षेत्रमा ट्राफिक व्यवस्थापनमा समस्या हुने गरेको छ । बागमती नगरपालिका–११ का हरि पुडासैनीका अनुसार महेन्द्र राजमार्गमा पहेँलो, हरियोलगायतका पोसाक लगाएका पैदल बोलबम यात्रुसँगै साइकल, मोटरसाइकल, ट्याक्टर, जिपलगायतका सवारीसाधनमा मानिसको बाक्लो आवागमन भइरहेको छ ।
बागमती नदीबाट भारतसहित महोत्तरीको टुटेश्वरलगायत विभिन्न स्थानमा रहेका शिवालयमा चढाउन जल उठाउन भक्तजन आउने गरेका छन् । पुडासैनीका अनुसार यस अवधिमा नेपालीसँगै भारतीय नागरिकसमेत ठूलो सङ्ख्यामा बागमतीमा जल उठाउन आउने गर्छन् । यद्यपि अघिल्ला वर्षको तुलनामा यसपटक जल उठाउन आउने भक्तजनको भीड केही कम रहेको पुडासैनीले बताए ।
टन्टलापुर घाममा राजमार्ग हुँदै यात्रा गर्ने बोलबम यात्रुलाई विभिन्न स्थानमा स्थानीय तथा स्वयंसेवकले पानी, सर्वतलगायत पेयपदार्थ वितरण गर्ने क्रमसमेत बढेको छ ।
