जनकपुरधाम । धनुषा जिल्ला अदालतको मूल गेटअगाडि मिटरब्याज पीडित एक महिलाले आत्मदाहको प्रयास गरेपछि बुधबार दिउँसो केहीबेर तनावपूर्ण अवस्था सिर्जना भएको छ ।
जनकपुरधाम उपमहानगरपालिका–४ निवासी फुलकुमारी रजकले मिटरब्याज पीडितहरूको विरोध प्रदर्शनका क्रममा आफ्नो शरीरमा पेट्रोल खन्याएर आत्मदाहको प्रयास गरेकी हुन् । घटनास्थलमा खटिएका प्रहरीले तत्काल हस्तक्षेप गर्दै उनलाई नियन्त्रणमा लिएपछि उनले शरीरमा आगो लगाउन भने पाइनन् । प्रहरीको समयमै भएको हस्तक्षेपका कारण सम्भावित ठूलो दुर्घटना टरेको हो ।
मिटरब्याज पीडितहरूले जिल्ला अदालत पुग्नुअघि जिल्ला प्रहरी कार्यालय धनुषाअगाडि पनि प्रदर्शन गरेका थिए । त्यसपछि उनीहरू अदालत परिसरमा पुगेर न्यायको माग गर्दै नाराबाजी गरेका थिए ।
उक्त समयमा पक्राउ परेका मिटरब्याजका आरोपित गोपाल साह, रेखा साह र हरेराम साहविरुद्ध धनुषा जिल्ला अदालतमा थुनछेक बहस चलिरहेको थियो । सोही क्रममा पीडित पक्षले विरोध प्रदर्शनलाई तीव्र बनाएको थियो ।
आत्मदाहको प्रयासपछि प्रहरीले फुलकुमारी रजकलाई नियन्त्रणमा लिई आवश्यक कानुनी प्रक्रिया अघि बढाएको जनाएको छ। घटनापछि अदालत परिसरमा सुरक्षा व्यवस्था थप कडा पारिएको छ ।
