राष्ट्रिय स्वतन्त्र पार्टी (रास्वपा) पर्साका सभापति एवं पर्सा क्षेत्र नम्बर १ का सांसद हरि पन्तले वीरगंजमा पर्यटकीय गतिविधि विस्तार गर्न सर्लाहीको भरत तालजस्तै मानव निर्मित ताल निर्माण गर्न संस्कृति, पर्यटन तथा नागरिक उड्डयनमन्त्री गणेश पौडेलसँग आग्रह गरेका छन् ।
शनिबार वीरगंजस्थित क्लासिक ब्याङ्क्वेटमा आयोजित स्थानीय नेता तथा कार्यकर्तासँगको भेटघाट कार्यक्रममा सांसद पन्तले वीरगंजमा पर्यटकीय पूर्वाधारको विकासका लागि मानव निर्मित ताल निर्माण गर्नुपर्ने प्रस्ताव मन्त्री पौडेलसमक्ष राखेका हुन् ।
सांसद पन्तको प्रस्तावलाई सम्बोधन गर्दै मन्त्री पौडेलले स्थानीय सरकारले ताल निर्माणका लागि आवश्यक जग्गा उपलब्ध गराउन सके संघीय सरकारले वीरगंजको पर्यटन प्रवर्द्धनका लागि ताल निर्माण गर्न बजेट विनियोजन गर्ने बताएका छन् ।
मन्त्री पौडेलले नेपाल सरकार मधेस प्रदेशमा पर्यटन प्रवर्द्धनको सम्भावना खोजी गर्दै पर्यटकीय स्थलहरूको पहिचान र विकासको काममा लागेको बताए । मधेसमा रहेका धार्मिक, सांस्कृतिक, ऐतिहासिक तथा प्राकृतिक पर्यटकीय क्षेत्रलाई जोडेर पर्यटन विकास गर्न सकिने उनको भनाइ थियो ।
मन्त्री पौडेलले शनिबार पर्सा राष्ट्रिय निकुञ्ज, गढीमाई मन्दिर तथा सिम्रौनगढको भ्रमण गरेका थिए ।
.jpg)
.jpg)
.jpg)
.jpg)
त्यसपछि आइतबार वीरगंजमा स्थानीय नेता तथा कार्यकर्तासँग भेटघाट गरेका हुन् ।
भेटघाटपछि मन्त्री पौडेलले वीरगंज उद्योग वाणिज्य संघमा स्थानीय उद्योगी तथा व्यवसायीसँग समेत वीरगंजको पर्यटन प्रवर्द्धनका विषयमा अन्तरक्रिया गरेका थिए । कार्यक्रममा वीरगंजको पर्यटन विकास, पर्यटकीय पूर्वाधार निर्माण तथा स्थानीय सम्भावनाको उपयोगका विषयमा छलफल भएको थियो ।
क्लासिक ब्याङ्क्वेटमा आयोजित कार्यक्रम रास्वपा पर्साका सभापति हरि पन्तको अध्यक्षतामा सम्पन्न भएको थियो । त्यस्तै, वीरगंज उद्योग वाणिज्य संघमा आयोजित अन्तरक्रिया कार्यक्रम संघका अध्यक्ष हरि गौतमको अध्यक्षतामा सम्पन्न भएको थियो ।
कार्यक्रममा रास्वपा मधेस प्रदेशका सभापति तपेश्वर यादव, बारा क्षेत्रका सांसदहरू गणेश धिमाल, अरविन्द साह, चन्दन सिंहलगायतको उपस्थिति थियो ।
