मधेश प्रदेश सरकारका उद्योग, वाणिज्य तथा पर्यटनमन्त्री कनिश पटेलले वीरगंजमा उपभोक्ता अदालत स्थापना गर्नुपर्ने बताउनुभएको छ ।
उपभोक्ता हित संरक्षण मञ्च नेपालले वीरगञ्जमा आयोजना गरेको उपभोक्ता अदालत स्थापना तथा सञ्चालन र नसर्ने रोग रोकथामसम्बन्धी सरोकारवालासँगको अन्तरक्रिया कार्यक्रममा बोल्दै मन्त्री पटेलले वीरगंजमा उपभोक्ता अदालत आवश्यक रहेको बताउनुभएको हो ।
वीरगंजमा उपभोक्ता अदालत स्थापनाका लागि मन्त्रालयले निर्वाह गर्नुपर्ने भूमिका पूरा गर्न आफू तयार रहेको उहाँले बताउनुभयो । उपभोक्ता अदालतको महत्वबारे बुझ्दै जाँदा यसको आवश्यकता निकै महत्वपूर्ण रहेको पाएको उल्लेख गर्दै मन्त्री पटेलले संघीय सरकारले गरेको निर्णयअनुसार प्रदेश सरकारले उपभोक्ता हित संरक्षण ऐन बनाउन पहल सुरु गर्ने प्रतिबद्धता व्यक्त गर्नुभयो ।
स्थापना हुने उपभोक्ता अदालतले स्थानीय उत्पादनबाट ठगिएका उपभोक्तालाई क्षतिपूर्ति दिलाउनेसँगै आयातित वस्तुको नियमन कसरी गर्ने भन्ने विषयमा पनि ध्यान दिनुपर्ने उहाँको भनाइ थियो । दैनिक उपभोग गरिने वस्तु तथा जीवनशैलीका कारण नसर्ने रोग बढ्दै गएको उल्लेख गर्दै मन्त्री पटेलले समाजको चेतनास्तर अझ सशक्त बनाउनुपर्नेमा जोड दिनुभयो । नागरिकलाई राजनीतिक, आर्थिक तथा सामाजिक रूपमा सचेत बनाउन आवश्यक रहेको उहाँले बताउनुभयो ।
चुनावका बेला विभिन्न राजनीतिक एजेन्डा र प्रतिबद्धता लिएर जनतामाझ जाने तर प्रतिबद्धता पूरा नगर्ने राजनीतिक दल तथा नेतृत्वका विषयमा समेत कारबाहीको व्यवस्था हुनुपर्नेमा सोच्ने बेला आएको उहाँको भनाइ थियो । मन्त्री पटेलले पछिल्लो समय पत्रकारिता राजनीतिक विषयवस्तुमा बढी केन्द्रित हुँदै गएको भन्दै शिक्षा, कृषि, स्वास्थ्यलगायत सबै क्षेत्रका सूचना प्रवाहमार्फत जनतालाई सुसूचित गराउनेतर्फ पत्रकारिता अग्रसर हुनुपर्ने बताउनुभयो ।
उहाँले मानिसमा पूँजीवादी जीवनशैली अपनाउने होड बढेको र अरूलाई देखाउनकै लागि स्थानीय उत्पादनभन्दा आयातित वस्तुको प्रयोग बढ्दै गएको बताउनुभयो । स्थानीय उत्पादनलाई प्रोत्साहन गर्न चालु आर्थिक वर्षदेखि उद्योग, वाणिज्य तथा पर्यटन मन्त्रालयले विभिन्न कार्यक्रम सञ्चालन गर्ने जानकारीसमेत दिनुभयो । कार्यक्रममा उपभोक्ता हित संरक्षण मञ्च नेपालका केन्द्रीय अध्यक्ष ज्योति बाँनियाले उपभोक्ता अदालत स्थापना तथा सञ्चालनसम्बन्धी प्रस्तुति दिनुभएको थियो ।
उहाँले उपभोक्ता अदालतको आवश्यकता, स्थानीय उपभोक्ताको अवस्था तथा उपभोक्ता अधिकार र सचेतनाका विषयमा चर्चा गर्नुभयो । त्यस्तै, जनस्वास्थ्य कार्यालय पर्साका स्वास्थ्य अधिकृत धनी सिंहले नसर्ने रोगका कारण, अवस्था तथा तुलनात्मक तथ्याङ्कसहित कार्यपत्र प्रस्तुत गर्नुभयो ।
जिल्ला अदालत पर्साका मुख्य न्यायाधीश महेन्द्रप्रसाद पोखरेलले प्रत्येक उपभोक्ताले स्वच्छ, सफा तथा गुणस्तरीय वस्तु उपभोग गर्न पाउनुपर्ने बताउनुभयो । उपभोक्ता अदालतले संविधानविपरीतका घटना हुन नदिन महत्वपूर्ण भूमिका खेल्ने उहाँको भनाइ थियो ।
कार्यक्रममा पर्साका सहायक प्रमुख जिल्ला अधिकारी कृष्णजङ्ग थापाले ठगिएका उपभोक्तालाई क्षतिपूर्ति दिलाउन उपभोक्ता अदालत आवश्यक रहेको बताउनुभयो । पर्सा बारकी सचिव प्रतिमा चौरसिया, वरिष्ठ अधिवक्ता रामेश्वर सेढाईं, प्राध्यापक हरेराम ठाकुरलगायतले पनि वीरगंजमा उपभोक्ता अदालत स्थापनाको आवश्यकताबारे धारणा राख्नुभएको थियो ।
