सर्लाहीमा कलभर्टमुनि पुरुष मृत फेला, आफन्तद्वारा हत्या आशंका

प्रदेश

Home
प्रदेश
सर्लाहीमा कलभर्टमुनि पुरुष मृत फेला, आफन्तद्वारा हत्या आशंका

सर्लाहीमा कलभर्टमुनि पुरुष मृत फेला, आफन्तद्वारा हत्या आशंका

वीरगंज सिटी सोमबार, भदौ ८, २०८३

सर्लाहीको बरहथवा नगरपालिका–७, तीनघरियामा सोमबार बिहान एक पुरुष मृत फेला परेका छन् ।

बरहथवा नगरपालिका–३, भगवतीपुरका ४६ वर्षीय राजेश्वर पुरी कलभर्टमुनिको नालीमा मृत अवस्थामा फेला परेको इलाका प्रहरी कार्यालय बरहथवाले जनाएको छ । पुरी सोही स्थानमा किराना पसल सञ्चालन गर्दै आएका थिए । स्थानीयका अनुसार उनी आइतबार राति गाउँमै आयोजित भोजमा सहभागी भएका थिए ।

मृतकका ज्वाइँ सुवास गिरीले भने पुरीलाई रातभर भोज खुवाएर हत्या गरिएको आरोप लगाएका छन्। पसलमा उधारो खाएका व्यक्तिहरू मिलेर ससुराको हत्या गरेको हुनसक्ने उनको दाबी छ । गिरीले घटनामा शङ्कास्पद देखिएका व्यक्तिमाथि प्रहरीले तत्काल निगरानी तथा खोजतलास नगरेको गुनासो गर्दै दोषीलाई पक्राउ गरी कारबाही गर्न माग गरेका छन् ।

यता, प्रहरीले भने घटनाको कारण हालसम्म खुल्न नसकेको जनाएको छ । इलाका प्रहरी कार्यालय बरहथवाका प्रमुख एवं डीएसपी गोपीकृष्ण सुवेदीले घटनाको प्रकृति र शवको अवस्था हेर्दा घटना तत्काल शङ्कास्पद नदेखिएको भए पनि थप अनुसन्धान भइरहेको जानकारी दिए । डीएसपी सुवेदीका अनुसार आफू स्वयं घटनास्थलमा पुगेर घटनाबारे जानकारी लिएका छन् । उनले पोस्टमार्टम रिपोर्ट आएपछि मृत्युको वास्तविक कारण खुल्ने बताए ।